"Azərişıq" 28 min manat aldı, xəstəxananı 3 günlük qaranlıqdan xilas etdi

Ağsu rayon Mərkəzi Xəstəxanasının elektrik problemi həll olunub.

Bu barədə Publika.az-a Səhiyyə Nazirliyinin mətbuat xidmətinin əməkdaşı Səfayə Əhmədova məlumat verib.

Onun sözlərinə görə, artıq xəstəxananın borcu ödənilib və elektrik enerjisi bərpa edilib: “Borcun yaranma səbəbi xəstəxananın yeni binaya köçürülməsidir. Yeni binada xərclər artıb, büdcə isə köhnə binaya uyğun müəyyən edilmişdi. Sərfiyyat böyük olduğuna görə borc yaranıb”.

S.Əhmədova bildirib ki, elektrik olmadığı günlərdə heç bir problem yaşanmayıb: “Həmin günlər xəstəxanada generator işləyib. Bütün lazımı tibbi tədbirlər həyata keçirilib. Heç bir xəstənin başqa xəstəxanaya köçürülməsinə ehtiyac qalmayıb”.

Xəstəxananın baş həkimi Şəhrəbanu Məlikova Publika.az-a xəstəxananın 28 min manat borcu olub: “Artıq borc tam ödənilib. Borca görə əvvəldən bizə “Azərişıq” tərəfindən xəbərdarlıq edilmişdi. Lakin bizim büdcəmiz köhnə xəstəxanın büdcəsinə uyğun hesablanmışdı. Yeni xəstəxanada müasir avadanlıqlara daha çox elektrik sərf edilib. Ona görə də borc yaranıb. Üç gün əvvəl 15 dəqiqə işıqların kəsiləcəyini dedilər, sonra bir də vermədilər. Bu gün isə təxminən yarım saat olar elektrik bərpa edilib. Növbəti ilin büdcəsi isə yeni xəstəxanaya uyğun hesablanıb, bir daha belə hal yaşanmayacaq”.

Gülxar