Şokoladları qurdlanmaqdan necə qoruyaq?

Quru meyvələr, çərəzlər damaq dadımızın ayrılmaz ləzzətlərindən biridir. Hələ bu çərəzlərin şokoladla qovuşmuş halı əvəzolunmaz dad yaradır. Amma bu dadlı qidanın bizdən başqa da damaq dostları var - qurdlar. Bu dəfə çərəzli şokoladların niyə qurdlandığı haqqında məlumat verəcəyik.

Çərəzli şokoladların qurdlanması haqqında şikayətlər çoxdur. Lakin, qurdlanma prosesi şokoladın özü ilə deyil, onun tərkibinə daxil olan inqredientlərin xüsusilə fındıq, püstə və digər çərəzlərin qurdlanması ilə əlaqədardır. Qənnadı məmulatlarında yaranan bu qurdlara "güvə sürfələri" deyilir. Gün işığı, nəm və havaya qarşı həssas olan məhsulun keyfiyyətini itirməməsi üçün düzgün şəkildə saxlamaq lazımdır.

Şokolad məhsulları temperaturu 18-21°C və nisbi hava rütubəti 75%-dən çox olmayan quru və sərin şəraitdə saxlanmalıdır, ən optimal temperatur isə 20°C-dir. Eyni zamanda məhsullar üçün müəyyən edilən yararlılıq müddəti də vacib faktorlardan biridir. Son istifadə tarixi keçmiş şokolad məhsulları xarab ola, bəzi çeşidləri isə qurdlana bilər. Buna görə də məhsul qablaşdırmaları hava daxil olmayacaq şəkildə tam bağlı olmalıdır. Açıq qablaşdırmadakı məhsula rütubət daxil olduğu üçün boyatlayacaq və xarab olacaq. Xüsusilə yol kənarlarındakı satış köşkləri, qəsəbələrdə yerləşən kiçik mağazalarda əksər hallarda qida məhsullarının saxlanılma qaydalarına riayət olunmur. Mağazalarda şokolad məhsullarını çərəzlərlə yaxın şəraitdə saxlamaq arzuolunmaz haldır. Belə ki, köhnəlmiş və ya zərərvericilərə yoluxmuş çərəzlər yaxınlıqda saxlanılan konfet və ya şokolad məhsullarına da yoluxdura bilir. Birbaşa gün işığı və açıq şəraitdə saxlanıldığı üçün konfetlərin tərkibi dəyişilir. İstehlakçılara saxlanma şəraiti və istehsal tarixinə diqqət etmələrini, bütövlüyü pozulmuş qablaşdırmadakı məhsulları almamaları tövsiyə olunur. (trend)