Uşaq xəstəxanaları və pediatrlar azalıb: SƏBƏB və ŞƏRH

Dövlət Statistika Komitəsi 2005-2021-ci illərdə ölkənin səhiyyə sistemində baş verən mənfi tendensiyalarla bağlı hesabat yayıb. Hesabatda respublikada pediatr həkimlərin sayının 4323 nəfərdən 3206-a düşdüyü əks olunub. Uşaq sanatoriyalarının 18-dən 12-yə, uşaq poliklinikalarının, ambulatoriyalarının vә tәrkibindә uşaq şöbәsi olan müәssisәlәrin sayının isə 602-dən 230-a düşməsi göstərilir

Hesabatda qeyd olunan azalmanın səbəblərini Publika.az-a açıqlayan pediatr-həkim Vaqif Qarayev uşaq poliklinikalarının sahələrə bölündüyünü bildirdi:

“Hər sahə üzrə uşaqların sayı ilə bağlı normativ olur. Hansı sahədə uşaqların sayı çoxdursa, poliklinikalarda ona uyğun ştat cədvəli var. Əgər uşaqlar azdırsa, o zaman əlavə həkimin saxlanmasına ehtiyac qalmır, ştat cədvəli ixtisar olunur. Bu normativ uşaq ambulatoriyaları vә tәrkibindә uşaq şöbәsi olan müәssisәlәr üçün də keçərilidir. Kontingent yoxdursa, bu müəssisələri saxlamaq iqtisadi cəhətdən səmərəsizdir”.

Onun sözlərinə görə, hazırda pediatr öz vəzifəsini yerinə yetirir, uşaqların müayinəsini vaxtaşırı həyata keçirir:

“Yayılan hansısa xəstəlik epidemik deyilsə, mövsümi xaraker daşıyırsa, əlavə həkimə ehtiyac qalmır. Yaxud, bir bölgədə uşaqların sayı çox, pediatrlar azdırsa, o zaman problem yaşana bilər. Hazırda isə belə vəziyyətlə qarşılaşmırıq”.

Rövşən Ziya