İmmuniteti zəiflədən gizli amil üzə çıxdı
Bizi izləyin

Səhiyyə

İmmuniteti zəiflədən gizli amil üzə çıxdı

İmmuniteti zəiflədən gizli amil üzə çıxdı

Pensilvaniya Universitetinin alimləri bu qənaətə gəliblər ki, erkən yaşlarda piylənmə immun sisteminin fəaliyyətini uzun müddət poza və orqanizmin infeksiyalara qarşı müdafiə formalaşdırmaq qabiliyyətini zəiflədə bilər.

Publika.az xəbər verir ki, tədqiqatın nəticələri “Nature Immunology” jurnalında dərc olunub.

Mütəxəssislər yüksək yağ tərkibli qidalarla bəslənən gənc siçanları araşdırıblar. Piylənmədən əziyyət çəkən heyvanlarda immun cavabın formalaşmasında və qoruyucu anticisimlərin istehsalında iştirak edən müəyyən T-hüceyrə növünün yetişməsi pozulub. Nəticədə peyvənddən sonra orqanizmin immun reaksiyası daha zəif olub, infeksiyalara qarşı uzunmüddətli müdafiə formalaşdırmaq qabiliyyəti isə azala bilər.

Tədqiqatçılar müəyyən ediblər ki, bu dəyişikliklər immun sisteminin fəaliyyətinin tənzimlənməsində iştirak edən A20 geninin aktivliyinin azalması ilə əlaqədardır. Həmin genin aktivliyi pozulduqda immun hüceyrələrinin yetişməsi düzgün getmir və bu, sonradan immunoloji yaddaşın formalaşmasına təsir göstərə bilər.

Alimlər heyvanlar üzərində əldə etdikləri nəticələri A20 geninə təsir edən nadir genetik pozuntusu olan beş pasiyentin hüceyrələrinin təhlilinin nəticələri ilə müqayisə ediblər. Həmin şəxslərdə də müəyyən immun hüceyrələrinin çatışmazlığı aşkarlanıb. Bu isə sözügedən genin fəaliyyəti ilə qoruyucu immunitetin formalaşması arasında mümkün əlaqəyə işarə edir.

Tədqiqatın müəllifləri hesab edirlər ki, erkən yaşlarda qidalanma və orqanizmin metabolik vəziyyəti immun sisteminə əvvəllər düşünüldüyündən daha uzunmüddətli təsir göstərə bilər. Gələcəkdə alimlər immun hüceyrələrinin pozulmuş yetişmə prosesini bərpa etməyin və immun cavabı yaxşılaşdırmağın mümkün olub-olmadığını araşdırmağı planlaşdırırlar.

Nəticələr hələlik əsasən siçanlar üzərində aparılan təcrübələrə əsaslanır. Buna görə də əldə olunan qənaətləri birbaşa insanlara şamil etmək və ya uşaqlıq dövründə piylənmənin mütləq peyvəndlərin effektivliyini azaltdığını iddia etmək olmaz.

Hüseyn İbadlı

Oxumağa davam et
Reklam
Reklam

Gündəm