Vətəndaş 1000 manatdan razı, 1045 manatdan narazıdır - Səbəbi?

"Depozit olmayan və sadəcə istifadə etmək üçün kartda olan cari hesabımdan niyə 10% vergi tutulur? Axı mən istifadə etmək üçün bir kart almışam və ona pul qoymuşam ki, sadəcə haralardasa onlayn ödəniş üçün istifadə edim".

İnsanlar tərəfindən son zamanlar belə suallar tez-tez verilir.

Publika.az xəbər verir ki, iqtdisadçı Eldəniz Əmirov qeyd edib ki, cari hesabdakı vəsaitə depozit xüsusiyyəti verildiyi zaman onun gəliri vergiyə cəlb edilir.

"Məsələn, vətəndaş X bankın debet kartlarını alıb və kartdakı cari hesaba 1000 manat pul qoyub. Bu pul, sadəcə cari istifadə üçündür, nə faiz gəlmir, nə da hansısa vergi tutulmur. Amma bir gün vətəndaş eşidir ki, Y bank oxşar bir kart təklif edir və X bankla olan rəqabətdə müştərini qazanmaq üçün elan edir ki, mənim kartıma qoyulan və cari istifadə üçün nəzərdə tutulan vəsaitə illik 5% əlavə verəcəm. Vətəndaş da gedir Y bankın yeni kartını alır. Bir müddət sonra Y bankın kartı olan vətəndaşa SMS gəlir ki, sizdən vergi tutuldu. Bu zaman vətəndaş heç bir vergi tulmayan X bank kartından məmnun, vergi tutulan Y bank kartından narazı qalır".

E.Əmirov bunun, əslində yalnış olduğunu bildirib: "Ona görə ki, 1000 manat qoyduğun X kartında bir il sonra elə 1000 manat qalır, Y kartındakı 1000 manat isə 1050 manat olur (1000 +5%). Deməli, bank öz kartına depozit xüsusiyyəti verir və buna görə də birinci bankdan fərqli olaraq ikinci bank kartı vətəndaşa 50 manat pul qazandırır. Sadəcə qanunverciliyin yeni tələbinə görə, faiz gəlirinin 10%-i vergiyə cəlb edilir. Yəni gəlir olan 50 manatın 10%-ni vergi tuturlar və Y kartında 1045 manat pul qalır. Vətəndaş isə 1000 manat pul olan X kartından razı, 1045 manat pul olan Y kartından narazı olur. Çünki, Y kartı ilə bağlı ona SMS gəlir ki, 5 manat vergi tutuldu. Bu da psixoloji olaraq mənim pulumu niyə “yedilər” iradını yaradır", - iqtisadçı deyib.

Ayşən Rəhim