Bakıda hoteldə səs-küy salan qadın həbs edildi

Bakının Səbail rayonunda hoteldə səs-küy salan qadın həbs edilib.

Publika.az Teleqraf-a istinadən xəbər verir ki, hadisə Neftçilər prospektində yerləşən “Four Seasons” hotelində baş verib.

Saatlı rayon sakini, 1999-cu il təvəllüdlü A. Fətullayeva hoteldə mübahisə yaradıb, orada işləyən Mübariz Qəhrəmanlıya qarşı qeyri-etik ifadələr səsləndirib.

Mübariz Qəhrəmanlı izahatında qeyd edib ki, məlum hadisə günü, səhər saat 04:46 radələrində işlədiyi “Four Seasons” hoteldə 3 xarici vətəndaş, ikisi xanım və biri bələdçi yaxınlaşıb: “Xanımlardan biri spirtli içki təsiri altında hoteldə səs-küy salmağa başladı. Onların hotelə bu vəziyyətdə daxil ola bilməyəcəklərini bildirdim. Bu zaman xanım şəxsiyyətimə qarşı qeyri-etik küçə söyüşləri işlətdi”.

Təqsirli bilinən Fətullayeva isə izahatında özünü təqsirli bilib. O, hoteldə sərxoş halda olduğundan səs-küy salaraq nalayiq ifadələr işlətdiyini, etdiyi əməldən peşman olduğunu deyib.

Səbail Rayon Məhkəməsinin qərarı ilə Fətullayeva 10 gün müddətinə inzibati qaydada həbs edilib.