Vyanadan "Metsamor"a səfər - AEBA Baş direktoru AES-i yoxlayacaq

Atom Enerjisi üzrə Beynəlxalq Agentliyin Baş direktoru Rafael Mariano Qrossi oktyabrın 4-dən 5-dək Ermənistanda işgüzar səfərdə olacaq.

Publika.az xəbər verir ki, bu barədə Ermənistan Xarici İşlər Nazirliyinin sözçüsü Vahan Unanyan bildirib.

O qeyd edib ki, Ermənistan xarici işlər naziri Ararat Mirzoyan bu gün Atom Enerjisi üzrə Beynəlxalq Agentliyin Baş direktorunu qəbul edəcək.

Səfər çərçivəsində Baş direktor Rafael Mariano Qrossini Ermənistan Prezidenti Vaaqn Xaçaturyan, Baş naziri Nikol Paşinyan, ərazi idarəetmə və infrastruktur, səhiyyə nazirləri qəbul edəcəklər.

Atom Enerjisi üzrə Beynəlxalq Agentliyin Baş direktoru həmçinin, "Metsamor" Atom Elektrik Stansiyasına, Fanarjyan adına Milli Onkologiya Mərkəzinə baş çəkəcək və İrəvan Dövlət Universitetinin tələbələri üçün mühazirə oxuyacaq.

Atom Enerjisi üzrə Beynəlxalq Agentlik nüvə enerjisindən dinc məqsədlərlə istifadə sahəsində əməkdaşlığın inkişafı üzrə beynəlxalq təşkilatdır. Agentliyin əsası 1957-ci ildə qoyulub. Mənzil-qərargahı Vyanada (Avstriya) yerləşir.

Səxavət