Türkiyənin məşhur dəb mütəxəssisi: İnsanlar özlərini xoşbəxt etmək üçün... - MÜSAHİBƏ

Qardaş Türkiyədə sərt pandemiya, meşə yanğınları və sellərdən sonra əhali gücünü səfərbər edib, yenə var gücü ilə həyata qucaq açır. Həmsöhbətimiz özünün də dediyi kimi, 360 dərəcə modaya bürünən Umid Temurçin də istisna deyil.

Publika.az Türkiyənin tanınmış moda siması, məşhurların sevimli dəb mütəxəssisi Ümid Temurçinlə müsahibəni təqdim edir.

- Ümid bəy, modanın bütün sahələrinə nüfuz etdiyiz üçün sizi necə təqdim edəcəyimə qərar verə bilmirəm.

- Əslində özüm də sizinlə həmfikirəm. Moda yazıçısıyam. Həmçinin bir sıra məşhur geyim brendlərinin beynəlxalq arenada vitrin tanıtımında təşkilatçı prodüser, layihə rəhbəri kimi çalışıram. Dijital marketinq, moda nümayişinin təşkilatçısı master klaslar da verirəm. İnternet dövründə yaşayırıqsa, sosial media ilə sıx bağlı olmalıyıq. Odur ki, bu sahə üzrə də mütəxəssisləşmişəm. Modanın ixrac, idxal, markalaşma, kolleksiyanın hazırlanması, moda təşkilatçılığı kimi vəzifələri yerinə yetirirəm. Yəni özümü qısa təqdim etsəm, 360 dərəcə moda aləminə bürünmüşəm.

- Özünüzü televiziya aparıcı kimi də sınamısınız....

- Bəli. 2019-cu ildə "Fox" telekanalında “Həyat sənsən” moda verilişinin bütün bölümlərinin aparıcısı olmuşam. Əslində akademik təhsilim turizm və otel işidir. Bu sahə üzrə Amerikada təhsilimi davam etmişəm. Mayamidə təhsil alarkən bəzək əşyalarının hazırlanması kurslarına getdim. Yavaş-yavaş həvəs dairəm dəyişməyə başladı. Türkiyəyə geri qayıdandan sonra tekstil və markalaşma sahəsinə maraq göstərdim. Deyə bilərəm ki, özümü həmin illərdə tapdım.

- Yəqin pandemiya dönəmində modanın qismən süqutu sizin də əhvalınıza mənfi təsir etdi.

- Elədir. Digər sahələr kimi, pandemiya tekstil və moda aləminə də təsirini göstərdi. Birdən-birə hamı evinə qapandı. Əhali sosial medialarda daha fəal olmağa başladı. Bununla yanaşı ev stili dəbi yəni idman geyimləri trendi formalaşdı. Hətta evə qapandığımız müddətdə insanlar özlərini xoşbəxt etmək üçün alış-veriş saytlarına daxil olub onlayn şəkildə geyimlər sifariş etməyə başladılar. Bəli, yeni onlayn startaplar uğurlu oldu, lakin bir yandan da tanınmış brendlərin mağaza zəncirləri ciddi ziyan gördü. Lakin hətta sərt pandemiya dönəmində də moda aləmi kollektiv fəaliyyət üçün darıxmağa başladı. Yaradıcı insanların işləmək həvəsi tükəndi. Amma bizi sevindirən bir məqam da var ki, qapanmalar yavaş-yavaş ləğv olunur. Moda nümayişləri, beynəlxaq moda festivalları bərpa edilir.

Mənim də işim sırf bu sahə olduğu üçün artıq bütün gigiyena qaydaları, pandemiya qadağalarını qorunmaq şərtilə tədbirlərin keçirilməsindən çox məmnunam. Yeni kolleksiyalar da gün işığına çıxır. Moda dirçəlir. Bu hərəkətliliyə şahidlik etmək gözəldir.

- Bütün işlərinizlə yanaşı Türkiyənin məşhur simalarının dəb məsləhətçisi kimi çalışmağa davam edirsiniz.

- Deniz Akkaya, Jülide Ateş, Gökhan Tepe və digər məşhurlarla çalışmışam. Bu fəaliyyətimi indi də davam etdirirəm. Adların hamısını desəm, vaxtımız qalmaz. Amma ən çox zövq aldığım layihələrimi bölüşə bilərəm. Gülafer Ateşlə dünyanın ən nüfuzlu qırmızı xalı layihəsi olan “Oskar” mükafatının təqdimetmə mərasimlərində çalışırıq. Belə ki, Amerikanın tanınmış televiziya aparıcıları, jurnalistlər həmin mərasimdə Gülafer xanımın kolleksiyasından geyinib qırmızı xalının üzərində dünyanın ən məşhur aktyorlarından, rejissor və ssenari müəlliflərindən müsahibələr götürürlər. Bundan başqa Hollivudda bir sıra tədbirlərin moda təşkilatçılığını da yerinə yetiririk. Bu yaxınlarda Elton Conun qala gecəsinə qatılan ingilis kraliyyət ailəsinin üzvü Ledi Viktoriya Harvi bizim kolleksiyamızdan geyindi.

- Ümid bəy, Türkiyədə baş verən meşə yanğınları, təbiətin çarəsizliyi, canlıların məhvi əminəm ki, sizin də həyatınızda unudlamaz hisslər yaradır.

- Ölkəmizdə baş verən yanğında hamımızın ciyəri kül oldu. Ağaclarımız, heyvanlarımız məhv oldu. Amma biz həmin sahələrin yenidən yaşıllığa bürünəcəyinə böyük ümid bəsləyirik. İnanırıq ki, yanğın sahələri indi də yeni inşaatların qurbanı olmayacaq. Həmçinin düşünürəm ki, digər sahələrdə çalışan vətəndaşlarımız kimi moda nümayəndələri də bu itkimizi nəzərə alıb, öz işlərində müəyyən qənaət edə biləcəklər.

- Məsələn...

- Məsələn, pambıq və kətan parçaları təbiət bizə bəxş edir. Həmçinin sağlamlığımız üçün faydalıdır. Bəli, bundan sonra da təbii materialların istehsalına davam edəcəyik, amma artıq israfçılığa yol verməməliyik. Bununla bağlı bir sıra köşə yazım da var.

- Bütün ağır imtahanlara rəğmən qardaş Türkiyədə həyat rəngli və sürətli templə davam edir.

- Doğrudur. Kino, serial, teatr sahəsi canlanmağa başladı. Müğənnilərimizin konsert proqramları üçün yeni səhnə geyimləri hazırlanır. Hot kutyur istehsalçılarının işləri günbəgün artmağa başlayır. Sərhədlər açıldığı üçün xaricdən gələn dəb həvəskarlarının, sifarişçilərin istəkləri artır.

Bildiyiniz kimi, toy, xına, nişan hər iki ölkənin sevilən və həvəslə gözlənilən mərasimləridir. İndi bu tədbirlərin sayı durmadan artır. Çüni insanlar yenidən sərt karantinin gələcəyindən ehtiyat edir, odur ki, bütün proseslər sürətlənir. Ümid edək ki, bundan sonra dünyamızda xəstəlikləri, ağrı-acıları, gözəllik, harmoniya və küçələrdə qayğısız dolaşıb, başı şopinqə qarışan insanların xoş həyəcanı əvəzləyəcək.

Leyla Sarabi