Trampın namizədindən qalmaqallı sözlər: bu ölkəni "nüvə gücü" adlandırdı

ABŞ-ın yeni seçilmiş prezidenti Donald Trampın müdafiə naziri vəzifəsinə namizədi Pit Heqset Şimali Koreyanı nüvə gücü adlandırıb.

Publika.az xəbər verir ki, Heqset ABŞ Senatında təsdiqləmə dinləməsindən əvvəl Silahlı Qüvvələr Komitəsinə verdiyi yazılı cavablarda Sakit okean regionunda geosiyasi vəziyyətə toxunub.

Şimali Koreyanı qlobal sabitliyə təhlükə yaradan nüvə gücü olaraq xarakterizə edən Heqset deyib:

"Şimali Koreyanın nüvə enerjisi statusu, nüvə başlıqları daşıya bilən raketlərin məsafəsinin artırılmasına intensiv diqqət yetirməsi və artan kiber imkanları Koreya yarımadasında, Hind-Sakit Okean regionunda və qlobal miqyasda sabitliyə təhlükə yaradır. Bu o deməkdir ki, Şimali Koreya ABŞ qoşunlarını təhdid edir. Birgə döyüş qabiliyyətlərinin inkişaf etdirilməsi və Yaponiya ilə qarşılıqlı fəaliyyət qabiliyyətinin artırılması Hind-Sakit Okeandakı çəkindirici duruşumuzu xeyli gücləndirəcək”.

Heqsetin Şimali Koreyanı nüvə gücü kimi təsvir etməsi mübahisələrə səbəb ola bilər, çünki ABŞ rəsmi olaraq onu nüvə dövləti kimi tanımır. Məlumdur ki, ABŞ rəsmilərinin əksəriyyəti qeyri-qanuni silah proqramını qəbul etməmək və qanuniləşdirməmək üçün Pxenyan administrasiyasını açıq şəkildə nüvə gücü kimi müəyyən etməkdə tərəddüd edir.

14 respublikaçı və 13 demokrat üzvdən ibarət Senatın Silahlı Qüvvələr Komitəsi Heqsetin dinləmələrini nəzərdən keçirəcək və sonra onu təsdiq üçün Senatın zalına göndərəcək. Heqset Senatda səs çoxluğu ilə təsdiqlənərsə, müdafiə naziri ola biləcək.

Aysel Şahmar