Tramp tibbi müayinədən keçəcək - Qorxulu nəsə var?

ABŞ prezidenti Donald Tramp oktyabrın 10-da Uolter Rid adına Tibb Mərkəzində "müntəzəm" tibbi müayinədən keçəcək.

Publika.az xəbər verir ki, bu barədə Ağ Ev bəyanat yayıb.

Bu, Trampın bu il ikinci tibbi müayinəsi olacaq.

"Prezident Tramp cümə günü səhər "Walter Reed" Tibb Mərkəzinə baş çəkəcək və hərbi personal qarşısında çıxış edəcək. Orada olarkən prezident Tramp illik müayinədən də keçəcək", - Ağ Evdən bildiriblər.

Qeyd edək ki, Tramp dəfələrlə Amerika liderinin sağlamlığına böyük ictimai marağın olmasına baxmayaraq, səhhəti ilə bağlı qeyri-şəffaf olmaqda ittiham olunub.

Sentyabr ayında o, sosial şəbəkələrdə səhhəti ilə bağlı yayılan şayiələri, o cümlədən ölümü ilə bağlı yalan xəbərləri təkzib edib.

Bildirilir ki, Tramp aprel ayında hərtərəfli tibbi müayinədən keçib, bundan sonra həkimi ABŞ prezidentinin “sağlamlığının əla olduğunu” qeyd edib.

Eyni zamanda, iyul ayında bildirilib ki, tibbi müayinə Trampın xroniki venoz çatışmazlığı olduğunu üzə çıxarıb.

Adəm