Tramp Avropanın bu ölkəsini hədələdi: Nədən narazıdır?

ABŞ prezidenti Donald Tramp müdafiə xərclərini ÜDM-in 5%-ə qədər artırmaqdan imtina etdiyi üçün İspaniyanı ticarət sanksiyaları ilə hədələyib.

Publika.az xəbər verir ki, bu barədə “Reuters” məlumat yayıb.

Ağ Evdə jurnalistlərə açıqlama verən Tramp qeyd edib ki, o, İspaniyadan "çox narazıdır", çünki bu, "xərclərini ÜDM-in 5%-nə qədər artırmayan yeganə ölkədir".

"Mən etdiklərinə görə onlara (İspaniya- red.) tariflər şəklində ticarət sanksiyaları tətbiq etməyi düşünmüşəm və düşünürəm ki, bunu edəcəm", - Tramp deyib.

Keçən həftə Ağ Evdə Finlandiya prezidenti Alexander Stubb ilə görüşü zamanı Tramp İspaniyanı müdafiə xərclərində “langar” adlandırıb və onun NATO-dan qovulmasının lazım olduğunu deyib.

Trampın sözlərinə cavab olaraq İspaniya hökuməti qeyd edib ki, İspaniya da ABŞ kimi “müdafiə məqsədlərini” yerinə yetirir, Alyansın tamhüquqlu üzvüdür və NATO-ya sadiqdir.

Qeyd edək ki, Alyansın təşkilatdan xaric edilməsi mexanizmi yoxdur və müttəfiqin çıxması yalnız könüllülük əsasında nəzərdən keçirilir.

Tural