“Yüzillik tərəfdaşlıq” sazişi rəsmən qüvvəyə mindi

Ukrayna və Böyük Britaniya arasında “yüzillik” tərəfdaşlıq haqqında saziş rəsmi olaraq qüvvəyə minib.

Publika.az xəbər verir ki, bu barədə Ukrayna Ali Radasının sədri Ruslan Stefançuk "Facebook"da məlumat yayıb.

Stefançukun sözlərinə görə, o, Böyük Britaniya parlamentinin İcmalar Palatasının spikeri Lindsi Hoyla sazişin mətnini, sənədin ratifikasiyası haqqında qanunu və onun qüvvəyə minməsi barədə notanı təqdim edib.

“Bu gün Londonda saziş rəsmən qüvvəyə mindi. Bu, ölkələrimiz arasında siyasi etimadın, strateji tərəfdaşlığın və sarsılmaz dostluğun möhkəmlənməsinin tarixi anıdır”, – deyə Stefançuk vurğulayıb.

Ali Radanın sədri qeyd edib ki, Kiyev və London uzun illərdir birgə bir çox sınaqlardan keçib və bu gün təkcə Ukraynanın azadlığı uğrunda deyil, həm də Avropanın təhlükəsizliyi və qlobal nizamın qorunması uğrunda mübarizə aparır.

Qeyd edək ki, bu il yanvarın 16-da Ukrayna və Böyük Britaniya yüzillik tərəfdaşlıq haqqında saziş imzalayıb. Sənəd iki ölkə arasında əməkdaşlıq çərçivəsini 100 il müddətinə genişləndirir, təhlükəsizlik, müdafiə, iqtisadiyyat, elm, texnologiya və mədəniyyət sahələrini əhatə edir.