Türk əsilli namizəd Berlin seçkilərində qələbə qazandı

Almaniyanın Sol Partiyası ("Die Linke") Berlin seçkilərində birinci yerə çıxaraq tarixi olaraq yüksək nəticə əldə edib.

Publika.az xəbər verir ki, bu barədə “Anadolu” məlumat yayıb.

Seçki siyahısına türk əsilli namizəd Elif Eralp başçılıq edir; o, koalisiya hökuməti qurulacağı təqdirdə miqrasiya keçmişinə malik Berlindən olan ilk baş burqomist (mer) ola bilər.

ARD-nin son proqnozuna görə, “Die Linke” səslərin 24,9 faizini qazanır – bu, partiyanın 12,2 faiz səs topladığı 2023-cü ildəki seçkilərlə müqayisədə demək olar ki, iki dəfə çoxdur. Kansler Fridrix Mertzə məxsus mühafizəkar Xristian-Demokrat İttifaqı (CDU) 20 faizlə ikinci yeri tutur.

Bundan sonra “Almaniya üçün Alternativ” (AfD) 15,7 faizlə, “yaşıllar” 15 faizlə və Sosial-Demokrat Partiyası (SPD) 11,9 faizlə gəlirlər. Sara Vaqenknextin İttifaqı (BSW) təxminən 5 faiz toplayır və əyalət parlamentinə daxil olur.

“Əziz berlinlilər, təşəkkür edirəm – etimadınız üçün təşəkkür edirəm”, – deyə bazar axşamı Eralp tərəfdarlarına bildirib.

Onun sözlərinə görə, nəticə tarixi olub, seçicilər isə “Die Linke”yə yeni hökumət formalaşdırmaq üçün mandat veriblər.

Eralp Almaniyada, Türkiyədən miqrasiya etmiş ailədə anadan olub. Onun valideynləri – sosialistlər və həmkarlar ittifaqı fəalları 1980-ci il hərbi çevrilişindən sonra Türkiyədən qaçmışdılar. Eralp hüquqşünasdır, 2021-ci ildən Berlin Nümayəndələr Palatasının deputatı və hüquq müdafiəçisidir.

Seçkiqabağı kampaniya zamanı Eralp Nyu-Yorkun meri Zoran Mamdaninin uğuruna istinad edərək onu digər ölkələrin sol partiyaları üçün nümunə adlandırmışdı.

O bildirmişdi ki, onun kampaniyası Berlin üçün də mayak rolunu oynaya bilər. Eralpın kampaniyasının mərkəzində sosial bərabərsizlik, mənzil dəyəri və paytaxtda həyatın əlçatanlığı dayanır.

Eyni zamanda, “Die Linke”nin birinci yeri tutması özlüyündə hələ hökumətin avtomatik formalaşdırılması demək deyil: Berlin hökumətinin rəhbərini seçmək üçün digər partiyalarla koalisiya sazişi tələb olunacaq.

Hüseyn İbadlı