14 narkotacir qandallandı

Gürcüstanın Tbilisi, Kvemo Kartli, Şida Kartli, Acarıstan, İmereti və Sameqreloda eyni anda aparılan xüsusi əməliyyat zamanı 14 narkotik maddə alverçisi saxlanılıb.

Publika.az xəbər verir ki, bu barədə şimal-qərb qonşumuzun Daxili İşlər Nazirliyi məlumat yayıb.

Məlumata əsasən, saxlanılan şəxslərdən 11-i Gürcüstan, 3-ü isə xarici ölkə vətəndaşıdır.

Məhkəmənin qərarı əsasında hüquq-mühafizə orqanlarının əməkdaşları tərəfindən həyata keçirilən gizli istintaq hərəkətləri nəticəsində müəyyən edilib ki, təqsirləndirilən şəxslər müntəzəm şəkildə narkotik vasitələrin satışı ilə məşğul olublar.

Hüquq-mühafizə orqanlarının əməkdaşları tərəfindən saxlanılan şəxslərin üzərində olan və qanunsuz olaraq satdıqları külli miqdarda narkotik vasitələr - “heroin”, “heroin tozu", “alfa pvp” və “buprenorfin” maddi sübut kimi götürülüb.

Təqsirləndirilən şəxslərin yaşayış evlərinə baxış zamanı külli miqdarda narkotik vasitələrin satışından əldə edildiyi ehtimal olunan pullar maddi sübut kimi götürülüb. Faktla bağlı, Cinayət Məcəlləsinin 260-cı maddəsi ilə cinayət işi açılıb, saxlanılan şəxsləri 20 ilədək və ya ömürlük həbs cəzası gözləyir.