Dünya üçün əsas təhdid Putin yox, Trampdır: Sorğunun şok nəticəsi

İspanların 81 faizi ABŞ Prezidenti Donald Trampı sülhə təhdid hesab edir ki, bu da Vladimir Putindən (79,3%) iki faiz çoxdur.

Publika.az xəbər verir ki, bu, aprel ayında keçirilən “El Pais/Cadena SER” sorğusunun nəticəsidir.

Sorğuda respondentlərdən qlobal sabitliyə ən böyük təhlükə yaradan liderlərin adlarını çəkmələri istənilib.

İsrailin Baş naziri Binyamin Netanyahu 71,2% səslə üçüncü yerdə qərarlaşıb. Ondan sonra İranın Ali Lideri Müctəba Xamenei (62,9%), Kim Çen In (62,25%) və Si Cinpin (49,3%) gəlir.

Sorğunun nəticələri İspaniya cəmiyyətinin ümumi əhval-ruhiyyəsini əks etdirir: ABŞ-İsrail əməliyyatının başlanğıcından bəri Madrid açıq şəkildə tənqidi mövqe tutaraq ABŞ-ın İrana qarşı hücumlar üçün birgə hərbi bazalardan istifadə hüququnu rədd edib. Buna cavab olaraq Tramp İspaniya ilə ticarəti tamamilə kəsəcəyi ilə hədələyib. Baş nazir Pedro Sançes də öz növbəsində ABŞ-ın hərəkətlərini qınayaraq, onları beynəlxalq hüquqa zidd adlandırıb.

Müəllif: Tural