Trampın "üçüncü müddət" arzusu: Plan, mesaj, yoxsa siyasi manevr?

ABŞ prezidenti Donald Trampın üçüncü müddətə namizəd ola biləcəyi ilə bağlı müzakirələr davam edir. Lakin ekspertlər bu iddiaları daha çox siyasi mesaj və imic strategiyası kimi qiymətləndirir.

Publika.az xəbər verir ki, rusiyalı politoloq Konstantin Bloxin “News.ru”a açıqlamasında bildirib ki, Trampın üçüncü müddətlə bağlı gündəmi əsasən onun siyasi mövqeyini gücləndirməyə xidmət edir.

Onun sözlərinə görə, ABŞ-da konstitusiya prezidentin yalnız iki müddət vəzifədə qalmasına imkan verir və bunun dəyişdirilməsi üçün ciddi hüquqi mexanizmlər lazımdır:

“Bunun üçün həm ictimai rəy dəyişməli, həm də konstitusiyaya düzəliş edilməlidir. ABŞ cəmiyyəti isə bu cür təşəbbüslərə mənfi yanaşır”.

Politoloq həmçinin Trampın yaş faktoruna da diqqət çəkib və hazırkı müzakirələrin real plan deyil, daha çox siyasi siqnal olduğunu vurğulayıb.

Ekspertin fikrincə, bu cür açıqlamalar Respublikaçıların mövqeyini gücləndirmək və Trampın özünü güclü lider kimi təqdim etmək məqsədi daşıyır:

“Əsl məqsəd üçüncü müddət deyil, onun hələ də güclü və təsirli lider olduğunu göstərməkdir”.

Adəm