Sikorski “Fort Tramp" adını alçaldıcı saydı

Polşada ABŞ-ın daimi hərbi bazasının yaradılması ilə bağlı müzakirələr davam edir. Xarici işlər naziri Radoslav Sikorski bazanın “Fort Tramp” adlandırılması ideyasını tənqid edib.

Publika.az xəbər verir ki, Sikorski jurnalistlərə açıqlamasında belə bir adın Polşa üçün alçaldıcı göründüyünü bildirib. Onun sözlərinə görə, hökumət və prezident bazanın yaradılması istiqamətində birgə çalışır, lakin obyektin “Fort Tramp” adlandırılması “alçaldılma nümayişidir”.

Nazir ABŞ-da obyektlərin siyasətçilərin adını daşımasının geniş yayıldığını, lakin bunun hörmət doğurmadığını deyib. O, həmçinin adın maliyyələşdirmə baxımından risk yarada biləcəyini vurğulayıb. Sikorskinin sözlərinə görə, bazanın maliyyələşdirilməsi ABŞ Konqresinin təsdiqindən keçməlidir və “Fort Tramp” adı konqresmenlərin xoşuna gəlməyə bilər.

Sikorski hesab edir ki, ABŞ siyasətçilərindən Ronald Reyqanın adı hərbi bazaya verilmək üçün daha uyğun variant ola bilər. O, həmçinin Pułaski və Koşçyuşko adlarını mümkün alternativlər kimi göstərib.

Müəllif: Adəm Abbaslı