Dolların gələn il üzrə məzənnəsi ilə bağlı proqnozlar açıqlandı

“Morgan Stanley”, eləcə də “JPMorgan Chase” investisiya banklarının strateqləri dolların məzənnəsinin gələn ilin ortalarında zirvəyə yüksələcəyini, sonra sərt eniş yaşayacağını proqnozlaşdırırlar. "Societe Generale"dan verilən açıqlamada bildirilir ki, dollar indeksi gələn ilin sonuna qədər 6 faiz ucuzlaşacaq. Bankın valyuta strategiyasının rəhbəri Kit Juckes bildirib ki, 2024-cü ili 2015-ci ildən bəri ən güclü ralli ilə başa vuran dollar dayanıqlı olmayan mərhələyə keçir.

Publika.az xəbər verir ki, dollar indeksi 2024-cü ildə 6,3 faiz bahalaşıb. Yükəlmə əsasən ABŞ-da noyabrın əvvəlində keçirilən prezident seçkilərindən sonra Donald Trampın bəzi ölkələrlə ticarətdə gömrük rüsumlarının artırılacağı ilə bağlı açıqlamalarından sonra baş verib. “Morgan Stanley”in makro və valyuta strateqlərinin fikrincə, gələn ilin bu vaxtı dollar indiki səviyyədən çox aşağı olacaq. “JPMorgan” analitikləri isə hesab edir ki, Federal Ehtiyat Sistemi faiz dərəcələrini əhəmiyyətli dərəcədə yumşaldarsa, dollar nisbi gəlir/böyümə üstünlüyünü itirəcək. Bu da ABŞ valyutasının kəskin zəifləməsinə gətirib çıxaracaq.