İdman

"Barselona" rəhbərliyi Levandovskidən qol vurmamağı niyə xahiş edib? - SİRR AÇILDI

20 Noyabr 2025 12:39

“Barselona” rəhbərliyi 2022/2023 mövsümündə komandanın hücumçusu Robert Levandovskidən az qol vurmağı xahiş edib.

Publika.az xəbər verir ki, buna səbəb “Bayern”dən transfer edilən polşalı futbolçunun müqaviləsində yer alan qol bonusu ilə bağlı maddənin aktivləşməsinin qarşısını almaq olub. Bu barədə "Sport.es" “Levandovski: Həqiqi olan” kitabına istinadla məlumat yayıb.

Kitabda polşalı futbolçu bildirib ki, klub funksionerləri, o cümlədən “Barselona”nın prezidenti Xuan Laporta, ondan çox qol vurmamağı xahiş ediblər, çünki əks halda katalon klubu “Bayern”ə 2,5 milyon avro ödəməli olacaqdı. Bu söhbət La Liqada “Barselona”nın çempionluq qazanmasından sonra baş verib.

Levandovski rəhbərliyin sözünü eşidib və mövsümü 23 qolla başa vurub.

Qeyd edək ki, noyabrın əvvəlində "Bild" nəşri Levandovskinin transferindən üç il ötməsinə rəğmən “Barselona”nın Münhen klubuna 20 milyon avro borclu olduğunu iddia edib.

Heybət