Futbolçu üsyan etdi, polis araşdırmaya başladı: oyunda nə baş verib?

“Arsenal”ın “Everton” üzərində 2:0 hesablı qələbəsi ilə başa çatan oyundan sonra “Emirates” stadionunda baş verdiyi iddia olunan insident polis tərəfindən araşdırılır.

Publika.az xəbər verir ki, Liverpul klubunun hücumçusu Tierno Barri matç zamanı dostlarının hücuma məruz qaldığını bildirib.

69-cu dəqiqədə ehtiyat oyunçular skamyasından meydana daxil olan Barri sosial şəbəkədə video paylaşaraq dostlarının hədəfə alındığını və azarkeşlərimizin mümkün reaksiyasından ehtiyat edildiyi üçün təhlükəsizlik əməkdaşları və polis tərəfindən tribunadan çıxarıldığını iddia edib.

Metropoliten Polisi isə açıqlamasında bildirib ki, hadisə nəticəsində xəsarət alan olmayıb və heç kim saxlanılmayıb. Hüquq-mühafizə orqanları hadisədə iştirak edən şəxslərin müəyyənləşdirilməsi üçün hər iki klubla əməkdaşlıq edir. Araşdırmaya Mersisayd Polisi də dəstək verir.

Barri oyundan sonra “Instagram” hesabında yazıb: “Stadionda belə davranış qəbuledilməzdir. Mən dostlarımı oyundan zövq almaq üçün gətirirəm, amma bir neçə düşüncəsiz insan buna mane olur.

Futbol hamının özünü təhlükəsiz və hörmət olunmuş hiss etdiyi yer olmalıdır. Bu cür münasibətin oyunda yeri yoxdur və futbolda buna dözülməməlidir.

Azarkeşlərimizin mümkün reaksiyasından ehtiyat edildiyi üçün dostlarım və hücuma məruz qalan digər şəxslər “Arsenal” klubunun təhlükəsizlik əməkdaşları və polis tərəfindən müşayiət olunaraq stadiondan çıxarıldı”.

Metropoliten Polisindən verilən açıqlamada isə belə deyilib: “Polis əməkdaşları və stadion nəzarətçiləri hadisəyə müdaxilə edib. Ciddi xəsarət alan olmayıb.

Araşdırma davam edir və hadisədə iştirak edən şəxslərin müəyyənləşdirilməsi üçün hər iki klubla işləyirik. Hələlik heç kim saxlanılmayıb”.