"Liverpul"un 125 milyonluq transferi araşdırılacaq: Nə baş verir?

Aleksandr İsakın "Liverpul"a rekord məbləğ - 125 milyon funt sterlinq qarşılığında transferində iştirak edən agent Zoran Lemiçin fəaliyyəti İngiltərə Futbol Assosiasiyası tərəfindən araşdırıla bilər.

Publika.az xəbər verir ki, məsələ "Çelsin"in keçmişdə İngiltərə Premyer Liqası agent ödəniş qaydalarını pozması ilə bağlıdır. London klubu 2012-2015-ci illər arasında baş verən pozuntuları özü açıqladıqdan sonra 10,75 milyon funt cərimələnib, akademiya transferlərinə 9 aylıq qadağa alıb və əsas komanda üçün şərti transfer sanksiyası ilə üzləşib. Bu dövr Roman Abramoviçin klub sahibi olduğu vaxta təsadüf edir.

Məlumata görə, İngiltərədə qeydiyyatdan keçmiş Zoran Lemiç və onun qardaşı Vlado Lemiç "Çelsi"dən Ramires, David Luiz, Nemanya Matiç və Andre Şürrle kimi transferlərlə bağlı xidmətlərinə görə bəyan edilməmiş ödənişlər alıblar. Premyer Liqanın açıqlamasında bu ödənişlərin rəsmi şəkildə qeyd olunmadığı təsdiqlənib.

Hazırda Zoran Lemiçin adı yenidən gündəmə gəlib, çünki o, ötən yay transfer pəncərəsinin son günündə "Nyukasl"dan "Liverpul"a keçidi reallaşdıran əsas vasitəçilərdən biri olub. Onun İngiltərədə qeydiyyatdan keçməsi səbəbindən İngiltərə Futbol Assosiasiyası tərəfindən araşdırma riski var, qardaşı Vlado isə bu yurisdiksiyaya daxil deyil.

Qeyd edək ki, Aleksandr İsak Liverpulla 6 illik müqavilə imzalayıb. O, bu mövsüm bütün turnirlərdə 16 oyunda 3 qol vurub, lakin dekabr ayında fibula sümüyünü sındırdığı üçün sıradan çıxıb. 26 yaşlı hücumçunun gələn ay meydanlara qayıtması gözlənilir.

Heybət