Ağ Evdən siqnal gəldi: Tramp İnfantinoya kömək edəcək

Donald Tramp Canni İnfantinonun FİFA prezidenti vəzifəsini qoruyub saxlamasına kömək etməyə çalışacaq.

Ötən həftə FİFA-nın turnir hüquqlarını satmaq üçün yeni kommersiya strukturu olan “FIFA Forward Enterprise” (FFE) yaratmağı planlaşdırdığı açıqlandı. İnfantino sonradan futbol konfederasiyalarının tənqidləri və UEFA üzv ölkələrinin Dünya Kubokunu boykot etmək təhlükəsi fonunda bu ideyadan imtina etmək qərarına gəldi.

Publika.az xəbər verir ki, “New York Post” qəzeti İnfantinonun Avropa futbol assosiasiyalarının etimadının itirilməsi fonunda ABŞ dövlət katibi Marko Rubio ilə danışıqlar planlaşdırdığını bildirib. İsveçrəlilərin qarşıdan gələn FIFA seçkilərindən əvvəl ABŞ prezident administrasiyasının dəstəyini almaq üçün Tramp kabinetinin rəsmilərinə zəng etməyə hazırlaşdığı barədə məlumatlar yayılıb.

Rubionun köməkçisi daha sonra Beynəlxalq Futbol Federasiyasının rəhbəri ilə danışıqlar barədə şayiələri təkzib etdi.

“The Telegraph” qəzetinin yazdığına görə isə ABŞ prezident administrasiyasının yüksək vəzifəli məmuru Trampın İnfantinoya kömək etməyə çalışacağını bildirib.

“Canni tarixin ən yaxşı Dünya Kubokuna ev sahibliyi etməyimizdə mühüm rol oynadı. Prezident onu həqiqətən sevir. Əminəm ki, prezident ona kömək etmək üçün əlindən gələni edəcək.

Düşünmürəm ki, müttəfiqlərinə sadiq olan prezident onun haqqında fikrini dəyişsin. Canni Dünya Kubokunu ABŞ-a gətirdi. Biz bunu qiymətləndiririk”, – mənbə bildirib.

Müəllif: Tural