Qəzadan sonra 9-cu dəfə əməliyyat olundu - Ayağı düzəlmir

Amerikalı dağ xizəkçisi Lindsi Vonn 2026-cı il Qış Olimpiya Oyunlarında keçirdiyi ağır qəzadan sonra doqquzuncu dəfə cərrahiyyə əməliyyatı keçirib. 42 yaşlı idmançı ayaq və topuq nahiyəsindəki sınıqlardan sonra uzunmüddətli müalicəsini davam etdirir.

Publika.az xəbər verir ki, bu barədə BBC məlumat yayıb.

Vonn əməliyyatdan əvvəl sosial şəbəkədə paylaşdığı videoda bunun sonuncu müdaxilə olacağına ümid etdiyini bildirib. O, prosedurdan əvvəl həyəcanlı və narahat olduğunu, eyni zamanda uzun müddətdir gözlədiyi bu mərhələnin geridə qalmasını arzuladığını deyib.

İdmançının sözlərinə görə, həkimlər əvvəlki səkkiz əməliyyat zamanı zədələnmiş nahiyələrə yerləşdirilən metal konstruksiyaları çıxarıblar. Bu müdaxilə həmçinin sol dizindəki ön çarpaz bağın (ACL) bərpası üçün hazırlıq məqsədi daşıyıb.

Vonn bildirib ki, əməliyyat üçün sümüklərinin sağalmasını doqquz ay gözləyib. Sınıqların sağalması müsbət nəticə olsa da, dizindəki bağ zədəsi səbəbindən qarşıda daha 6-9 aylıq bərpa dövrü var.

Olimpiya qəzası İtaliyanın Kortina şəhərində keçirilən eniş yarışında baş verib. Sol dizindəki bağları zədələməsindən cəmi doqquz gün sonra starta çıxan Vonn yarışın 13-cü saniyəsində qapıya çırpılaraq yıxılıb.

2010-cu il Vankuver Qış Olimpiadasının eniş üzrə çempionu olan Vonn əvvəlki əməliyyatların onun ayağının amputasiyasının qarşısını aldığını da açıqlamışdı.

Dağ xizəyinin ən uğurlu idmançılarından sayılan Vonn 2019-cu ildə çoxsaylı zədələr səbəbindən karyerasını başa vurmuşdu. O, 2024-cü ildə sağ dizinin bir hissəsinin protezlə əvəzlənməsindən sonra gözlənilmədən idmana qayıdıb. İdmançının Dünya Kubokunda 84 qələbəsi var. Bu göstərici ilə o, qadınlar arasında bütün zamanların rekordçusu Mikaela Şiffrindən sonra ikinci yerdədir.