Qızıl da bizimdir, gümüş də

Belarusun paytaxtı Minskdə Aleksandr Medvedin mükafatı uğrunda sərbəst və qadın güləşi üzrə böyüklər arasında beynəlxalq Qran Pri turnirinin keçiriləcəyini xəbər vermişdik.

Publika.az xəbər verir ki, turnirin ilk günündə 57, 65, 74 və 97 kq çəki dərəcəsində sərbəst güləşçilər mübarizə aparıb.

97 kq çəki dərəcəsində finalda yığmamızın iki üzvü qarşılaşıb. Olimpiya oyunlarının ikiqat bürünc medalçısı Xetaq Qazyumov ukraynalı Hleb Kutey, Slovakiya idmançısı Jozef Jaloviar, moldovalı Nikolay Çeban, yarımfinalda isə gürcü Omar Qusoşvilini məğlub edib. Bütün rəqiblərinə xal vermədən qalib gələn Xetaq finalda yığmamızın digər üzvü Şərif Şərifovla qarşılaşıb. Olimpiya çempionu Şərifov finala qədər qazaxstanlı Mamed İbrahimov, ABŞ təmsilçisi David Zabriske, Ukrayna güləşçiləri - Pavlo Oleynik və Valeri Andreytsevi mübarizədən kənarlaşdırıb.

Final qarşılaşması Qazyumovun 5:0 hesablı üstünlüyü ilə tamamlanıb. Bu nəticəylə Qazyumov qızıl, Şərifov isə gümüş medal qazanıb.