Keyt Middlton Londonda Yelena Zelenskaya ilə görüşdü - FOTO

II Elizabetin dəfn mərasimi ərəfəsində Bukinqam sarayında anım mərasimində iştirak edən dövlət başçıları və xarici qonaqlar üçün nəzərdə tutulmuş təntənəli qəbul təşkil olunub. Bu tədbir çərçivəsində Uelsin yeni şahzadəsi Keyt Middlton Ukraynanın birinci xanımı Yelena Zelenskaya ilə görüşüb.

Publika.az xəbər verir ki, görüş üçün Keyt “Catherine Walker”dən paltar geyinib və onu keçmiş Uels şahzadəsi Şahzadə Dianaya məxsus mirvari qolbaqla tamamlayıb.

Bundan başqa Yelena Zelenskaya baş nazir Denis Şmıqal və Ukraynanın Böyük Britaniyadakı səfiri Vadim Pristayko və onun xanımı İnna ilə birgə Vestminster zalında kraliça ilə vidalaşıblar. Ukrayna nümayəndə heyəti zalın şərq divarının yaxınlığındakı platformada dayanıb. Britaniya nəşrlərinin yazdığına görə, Yelena Zelenskaya II Elizabetin tabutuna baxaraq ağlayıb.

Xatırladaq ki, Yelena Zelenskaya Avropa Parlamentinin Avropa İttifaqının vəziyyəti ilə bağlı illik hesabata həsr olunmuş iclasın xüsusi qonağı olub.