Məşhur aktrisanın 17 illik evliliyi bitir: ərinə 100 milyon dollar ödəyəcək

Hollivudun məşhur simalarından olan Cessika Alba-Keş Uorren cütlüyünün 17 illik evliliyi rəsmən sona yetir.

Publika.az xarici mediaya istinadən xəbər verir ki, cazibədar aktrisa Cessika Alba uzun müddətdir davam edən fikir ayrılıqlarına görə boşanmaq üçün məhkəməyə müraciət edib.

43 yaşlı Cessika Alba boşanma ərizəsini Hollivud məşhurlarına xidmət edən vəkil Laura Vasser vasitəsilə məhkəməyə verib. Onun əri, 46 yaşlı Keş Uorreni isə bu işdə tanınmış vəkil Adam Filip təmsil edəcək.

Onlar üç övladın - Honor (16), Haven (13) və Hayesin (7) birgə qəyyumluğunu istəyib.

Ancaq boşanma prosesində təkcə qəyyumluq məsələsi deyil, həm də böyük sərvət bölgüsü gündəmdədir. Cütlük evlilik sözləşməsi imzalamadığı üçün məhkəmənin çəkişməli keçəcəyi təxmin edilir.

Cessika Alba tərəfindən qurulan və orqanik məhsulların satışı ilə məşğul olan "The Honest Company" 625 milyon dollar dəyərində qiymətləndirilir. Digər tərəfdən, Keş Uorrenə məxsus alt paltarı və corab markasının dəyərinin 100 milyon dollar civarında olduğu bildirilir.

Cessikanın həyat yoldaşı Keşə boşanma üçün təxminən 100 milyon dollar ödəyəcəyi gözlənilir. Cütlüyün mallarının bölüşdürülməsi ilə bağlı danışıqların qarşıdakı dövrdə dəqiqləşəcəyi bildirilir.

Qeyd edək ki, cütlük 2008-ci ildə ailə qurub. Son zamanlarla onların münasibətinin pisləşdiyi barədə xəbərlər gündəmə gəlirdi.

Ləman