KTMT Düşənbədə toplandı: Hansı qərarlar verilib?

Tacikistanın paytaxtı Düşənbə şəhərində Kollektiv Təhlükəsizlik Müqaviləsi Təşkilatının (KTMT) üzvü olan dövlətlərin Xarici İşlər Nazirləri Şurasının növbəti iclası keçirilib.

Publika.az Tacikistan Xarici İşlər Nazirliyi mətbuat xidmətinə istinadla xəbər verir ki, iclasda KTMT-nin Baş katibi Stanislav Zas, Tacikistan, Rusiya, Belarus, Qazaxıstan, Qırğızıstan və Ermənistanın xarici işlər nazirləri iştirak ediblər.

Şuraya sədrlik edən Tacikistanın xarici işlər naziri Sirociddin Muxriddin KTMT-nin qəbul etdiyi qərarların yerinə yetirilməsi, Tacikistanın təşkilata sədrliyi dövründə əsas istiqamətlər barədə məlumat verib.

Şuranın iclasında KTMT çərçivəsində üzv ölkələr arasında əməkdaşlığın genişləndirilməsi, regional təhlükəsizliyin qorunması, Tacikistan-Əfqanıstan sərhədinin gücləndirilməsi sahəsində KTMT-nin qəbul etdiyi Proqramın yerinə yetirilməsi məsələləri, terrorizm, ekstremizm, mütəşəkkil cinayətkarlıqla mübarizə, narkotiklərin qeyri-qanuni dövriyyəsi ilə mübarizənin gücləndirilməsi məsələlərinə baxılıb.

Xatırladaq ki, Tacikistan 2021-2022-ci illərdə KTMT-yə sədrlik edir.