Dünyada ən aktiv ÜDM artımı Mərkəzi Asiyada olacaq

Mərkəzi Asiya ölkələrinin iqtisadiyyatları 2023-2024-cü illərdə ən yüksək templə inkişaf edəcək. Avropa Yenidənqurma və İnkişaf Bankının (AYİB) analitiklərinin proqnozuna əsasən, orta hesabla bu regionun dövlətlərinin ümumi daxili məhsulunun (ÜDM) həcmi cari və növbəti illərdə müvafiq olaraq 4,9% və 5,4% artacaq. AYİB).

Publika.az xəbər verir ki, Avropa Yenidənqurma və İnkişaf Bankının press-relizində Qazaxıstan, Qırğızıstan, Monqolustan, Tacikistan, Türkmənistan və Özbəkistan kimi ölkələrin iqtisadiyyatının artımından bəhs edilir. Eyni zamanda analitiklər ÜDM-də ən böyük artımı Tacikistanda (+8%) gözləyirlər. Bu göstəricinin ardınca Qırğızıstan və Monqolustan (+7%), Türkmənistan və Özbəkistanda isə proqnozlara görə, iqtisadiyyat 6,5% artacaq.

“Mərkəzi Asiyada 2023-cü ildə məhsul istehsalının 4,9 faiz artacağı gözlənilir. Planlaşdırılan infrastruktur investisiyaları, yüksək əmtəə qiymətləri və Rusiya müəssisələrinin köçürülməsi sayəsində məhsul istehsalının artımı 2024-cü ildə 5,4%-ə yüksələcək”, - qurumun maliyyə hesabatında bildirilib.

Mərkəzi Asiya iqtisadiyyatlarının yüksək artım tempinə bir sıra amillər təsir edəcək. Onlar arasında əmtəə ixracatçıları üçün yüksək neft və qaz qiymətləri, işçi qüvvəsi axınının, kapitalın və pul köçürmələrinin artması, habelə vasitəçilik ticarətinin artması AYİB-in proqnozunda əsas göstərilir. Eyni zamanda AYİB-in ekspertləri belə qənaətə gəliblər ki, region dövlətlərinə kapital və işçi qüvvəsi axını qismən biznesin Rusiyadan köçürülməsi ilə bağlıdır.

Fevralın 16-da Avropa Yenidənqurma və İnkişaf Bankının (AYİB) analitikləri 2023-cü ildə Rusiya ÜDM-nin 3% azalacağı ilə bağlı proqnozlarını olduğu kimi saxlayıblar. Bu, neftin qiymətinin düşməsi və Qərbin sanksiyaları fonunda baş verəcək. 2024-cü ildə Rusiya iqtisadiyyatının daha 1% kiçilməsi gözlənilir.

Aytən Məftun