Gəncə qapıları Azərbaycana qaytarıla bilər - Politoloq

Gəncə qapılarının Azərbaycana qaytarılması bizim tarixi haqqımızdır. Bu məsələnin müzakirə mövzusu olmasını biz zaman-zaman qeyd etmişik.

Bunu Publika.az-a açıqlamasında politoloq Zəlimxan Məmmədli deyib.

Politoloq qeyd edib ki, Azərbaycanla Gürcüstan tərəfdaşlıq etsə də, demarkasiya və delimitasiya məsələsi və digər mövzularda problemlər hələ də davam edir: “Gəncə qapılarının Azərbaycana qaytarılması müzakirə olunub, müsbət bir nəticə əldə olunarsa, bu, tarixə ədalətli yanaşma kimi qeyd olunacaq. Ancaq Gürcüstan tərəfinin də bu mövzuda öz baxışları var. Yəni, onların bu mövzuda başqa arqumentləri ola bilər.

Gəncə qapılarının qaytarılması məsələsi həm də diplomatik məsələdir. İki dövlət arasında olan münasibətlərə zərər vurmadan bu istiqamətdə danışıqlar aparılmalıdır. Belə olduğu halda yekunda ədalətli nəticə əldə oluna bilər. Biz qonşu dövlətlərik və kifayət qədər ortaq maraqlarımız mövcuddur. Azərbaycan Gürcüstanla əlaqələrin inkişaf etməsi üçün addımlar atır. İki dövlət arasında uzlaşma olarsa, Gəncə qapılarının qaytarılması reallaşacaq. Ümumi olaraq bu cür məsələlərin həll olunması bölgədə sabitliyin yaranmasına və əməkdaşlıqların daha da inkişaf etməsinə gətirib çıxaracaq. Azərbaycan dövləti çağdaş siyasətində Gürcüstanla əlaqələrin inkişaf etməsi üçün müəyyən addımlar atır. Bu mövzuda danışıqlar uğurla aparılarsa, Gəncə qapıları Azərbaycana qaytarıla bilər”.