Nida Təhlil
Bakı - Dünyanın dialoq və müzakirə mərkəzi
“Bakı belə mühüm forumların keçirilməsi üçün dünya
miqyasında mərkəzdir”.
Bu fikirləri Rusiya hökuməti sədrinin müavini Olqa Qolodets Bakıda
keçirilən VI Beynəlxalq Humanitar Forumunda çıxışı zamanı
bildirib.
Dünyanın mövcud mənzərəsində Azərbaycanın paytaxtı beynəlxalq
əhəmiyyətli tədbirlərin keçirildiyi siyasi, iqtisadi, eləcə də
ictimai-humanitar mərkəzə çevrilib.
25-26 oktyabr tarixində keçirilən Bakı VI Beynəlxalq Humanitar
Forum, forum iştirakçılarının sayı və müzakirə olunan məsələlər
bunun sonuncu nümunəsidir. Belə ki, 86 ölkə və 24 beynəlxalq
təşkilatdan 581 (416 xarici qonaq olmaqla) nümayəndənin iştirak
etdiyi forumda bəşəriyyətdə maraq doğuran qlobal xarakterli
məsələlərə dair müzakirələr aparıldı.
Bu forumun Bakıda keçirilməsi, ümumilikdə Azərbaycan paytaxtının
dünyanın dialoq mərkəzinə çevrilməsi səbəbsiz deyil.
1. Azərbaycan dövlətinin dialoqa, həmrəyliyə və sülhə
əsaslanan geniş spektrli siyasəti;
2. Azərbaycanda mövcud multikulturalizm, tolerant mühit və müxtəlif
dinlərin bir ailə kimi mehriban yaşaması;
3. Azərbaycanın dünyada artan siyasi və iqtisadi çəkisi;
4. Sabitlik və təhlükəsizlik;
Bu səbəblərin siyahısını uzada da bilərik, lakin bu gün Bakının
dünyanın sülh və dialoq mərkəzinə çevrildiyi reallıqdır.
Hələ 2008-ci ildə Prezident İlham Əliyev “Bakı prosesi” təşəbbüsü
irəli sürdü. 10 il öncə - 2008-ci ilin dekabrında Avropa Şurasına
üzv dövlətlərin mədəniyyət nazirlərinin “Mədəniyyətlərarası dialoq
– Avropada və qonşu regionlarda sülhün davamlı inkişafı” mövzusunda
keçirilən konfransda “Bakı prosesi” təşəbbüsü irəli sürüldü.
Azərbaycanın təşəbbüsü ilə Avropa Şurasına üzv dövlətlərin
mədəniyyət nazirlərinin konfransına ilk dəfə olaraq 10 islam ölkəsi
dəvət edildi. İslam dövlətlərinin iştirakı ilə mədəniyyət
nazirlərinin konfransı yeni bir formata transformasiya olundu.
Avropa və ona qonşu regionlardan 48 ölkənin, 8 beynəlxalq
təşkilatın və bir sıra beynəlxalq qeyri-hökumət təşkilatlarının
yüksək səviyyəli nümayəndələrinin iştirak etdiyi bu konfransda
“Mədəniyyətlərarası dialoqunun təşviqinə dair “Bakı Bəyannaməsi”
qəbul edildi.
Azərbaycan lideri dünyada münaqişələrin
dinlərarası-mədəniyyətlərarası toqquşmalara çevrildiyini görərək,
qlobal əhəmiyyətli addım atdı. Çünki Azərbaycan lideri bilirdi ki,
toqquşmaların bu yöndə getməsi dünyanın gələcəyi üçün xoşagəlməz
nəticələrə gətirib çıxaracaq və məhz bunun qarşısını almaq üçün ilk
dəfə İslam dünyası ilə xristianlığın hakim olduğu Qərb dünyası
Bakıda bir araya gətirildi. “Bakı prosesi”nin başladığı 10 il
boyunca görülən işlər və dünyada dinlərarası dialoqun möhkəmlənməsi
Prezident İlham Əliyevin qlobal səviyyədə uğurlu gediş etdiyini
göstərdi.
2010-cu ildən etibarən “Bakı prosesi” qlobal hərəkata çevrilməyə
başladı. 2010-cu ilin 23 sentyabr tarixində BMT-nin Baş
Assambleyasının 65-ci sessiyasında Azərbaycan Prezidenti tərəfindən
Bakıda Ümumdünya Mədəniyyətlərarası Dialoq Forumunun keçiriləcəyi
elan edildi.
Birinci addım: 2011-ci ilin 7-9 aprel tarixində
Bakıda YUNESKO, BMT-nin Sivilizasiyalar Alyansı, Avropa Şurası,
Avropa Şurasının Şimal-Cənub Mərkəzi və İSESKO-nun tərəfdaşlığı ilə
1-ci Ümumdünya Mədəniyyətlərarası Dialoq Forumu təşkil olundu.
Forumda 102 ölkədən rəsmi nümayəndə, 10-dan çox beynəlxalq qurumdan
rəhbər şəxs, 20 ölkədən nazir, məşhur media qurumlarının
nümayəndələri daxil olmaqla ümumilikdə dünyanın bütün qitələrindən
500-ə yaxın xarici ölkə təmsilçisi iştirak etdi. Qitələrarası
mədəni əməkdaşlığı inkişaf etdirmək məqsədilə I Ümumdünya
Mədəniyyətlərarası Dialoq Forumu çərçivəsində Azərbaycanın
təşəbbüsü ilə “5 A - Mədəniyyətlərarası Əməkdaşlıq Platforması”
təsis edildi. Avropa, Asiya, Amerika, Afrika, Avstraliya
qitələrinin adlarının Azərbaycan dilində “A” hərfi ilə başladığını
nəzərə alınaraq simvolik olaraq yeni platformanın adı “5 A” kimi
müəyyən olundu.
İkinci addım: 2013-cü ilin 29 may - 01 iyun
tarixində “Çoxmədəniyyətli dünyada sülh şəraitində birgə yaşamaq”
şüarı altında Bakıda 2-ci Ümumdünya Mədəniyyətlərarası Dialoq
Forumu keçirildi. Forumun təşkilində YUNESKO, BMT-nin
Sivilizasiyalar Alyansı, Avropa Şurası, Avropa Şurasının
Şimal-Cənub Mərkəzi və İSESKO ilə yanaşı, BMT-nin Ümumdünya Turizm
Təşkilatı da əsas tərəfdaş qismində çıxış etdi. 29 may 2013-cü il
tarixdə BMT Baş Assambleyası tərəfindən elan edilmiş “21 may -
Ümumdünya Mədəni Çeşidlilik Günü”nə həsr olunmuş Azərbaycanla
BMT-nin Sivilizasiyalar Alyansının birgə təşkilatçılığı ilə Bakı
şəhərində “Mədəni çeşidlilik üçün nəsə et qlobal kampaniyası”nın
zirvə toplantısı təşkil edildi. Tədbirdə BMT-nin Sivilizasiyalar
Alyansı üzrə Ali nümayəndəsi cənab Nassir Əbdüləziz əl-Nasser, bir
sıra ölkələrin mədəniyyət və turizm nazirləri, ekspertlər və digər
beynəlxalq qurumları təmsil edən şəxslər iştirakı ilə “5 A -
Mədəniyyətlərarası Əməkdaşlıq Platforması” çərçivəsində mədəni
çeşidliliyi təbliğ edən hər qitədən bir layihənin təqdimatı
keçirildi. Forumda ümumilikdə 600 xarici təmsilçi iştirak
edirdi.
Üçüncü addım: 18-19 may 2015-ci il tarixdə Bakı
şəhərində YUNESKO, BMT-nin Sivilizasiyalar Alyansı, BMT-nin
Ümumdünya Turizm Təşkilatı (BMÜTT), Avropa Şurası və İSESKO-nun
birgə tərəfdaşlığı ilə “Mədəniyyəti ortaq təhlükəsizlik naminə
paylaşaq” devizi altında 3-cü Ümumdünya Mədəniyyətlərarası Dialoq
Forumu təşkil olundu. Dünyanın ən nüfuzlu insanlarının da qatıldığı
forumda bəşəriyyəti narahat edən problemlərin müzakirəsi aparıldı,
çıxış yolları təqdim edildi.
Dördüncü addım: 4-6 may 2017-ci il tarixdə Bakı
şəhərində YUNESKO, BMT-nin Sivilizasiyalar Alyansı, BMT-nin
Ümumdünya Turizm Təşkilatı (BMÜTT), Avropa Şurası, Ərzaq və Kənd
Təsərrüfatı Təşkilatı və İSESKO-nun birgə tərəfdaşlığı ilə
“Mədəniyyətlərarası dialoqun inkişafı: İnsan təhlükəsizliyi, sülh
və davamlı inkişaf üçün yeni imkanlar” mövzusunda 4-cü Ümumdünya
Mədəniyyətlərarası Dialoq Forumu təşkil olundu. Ümumilikdə 800-dən
çox xarici nümayəndə Azərbaycan paytaxtında Forum çərçivəsində 40-a
qədər plenar iclasda dünyanın problemlərini müzakirə etdi.
Dünyanın belə müzakirələrə böyük ehtiyacı var, xüsusilə “qarşılıqlı
müzakirələrin çoxluğu, problemlərin həllinə bir o qədər yaxınlaşmaq
deməkdir” prinsipindən çıxış etsək, Bakının qlobal səviyyəli
müzakirə masasına çevrildiyini görmək olur.
Azərbaycanın başlatdığı prosesin dünya üçün yeni nümunə olduğu da
faktlarda öz əksini tapır.
Misal üçün, Avropada “Yaxın Şərqdə dini-mədəni plüralizm və sülh
içində yaşama” adlı beynəlxalq konfrans keçirildi. Bununla yanaşı,
“Qədim sivilizasiyalar forumu” və s. addımları da göstərmək olar.
Göründüyü kimi, Azərbaycanın təşəbbüsləri müxtəlif ölkələrin
multikulturalizm, tolerantlıq və dialoq siyasətinə ilham verdi.
Bakı Beynəlxalq Humanitar Forumunun keçirilməsi də Azərbaycanın
dünyanı qarşıdurmalardan, toqquşmalardan xilas etmək siyasətinin
bir parçasıdır. Bu forumun keçirilməsi qərarı 2010-cu ilin
yanvarında Azərbaycan və Rusiya prezidentlərinin təşəbbüsü ilə
Bakıda keçirilmiş Humanitar Əməkdaşlıq üzrə I Azərbaycan-Rusiya
Forumunda qəbul olundu. Forumun əsas məqsədi - humanitar və
inteqrativ impulsların yaradılması ilə yanaşı, gələcəkdə beynəlxalq
səviyyədə humanitar çağırışları aktuallaşdırmaq, dəyirmi masalar
vasitəsilə dialoqun qurulmasıdır. Forumun vəzifəsi isə ideyalar,
nəzəri və praktiki bilik mübadiləsi, konstruktiv debat və
müzakirələr üçün nəzəri və tətbiqi platforma yaratmaqdır. Forumun
nəticəsi beynəlxalq təşkilatlara, dünya ölkələrinə və ayrılıqda hər
bir şəxsə ünvanlanmış tövsiyələr və müraciətlərdə təcəssüm olunur.
Forum təşkilatçılarının və iştirakçılarının, təbii, sosial və
humanitar elmlər üzrə Nobel mükafatçılarının və beynəlxalq
qurumların rəhbərləri, o cümlədən dünya mədəni elitasının
nümayəndələrinin qarşılarında qoyduqları iddialı məsələ, gələcəkdə
beynəlxalq səviyyədə baxılması məqsədi ilə yeni humanitar gündəmin
formalaşmasıdır. Forum təşkilatçıları sırasına həmçinin dövlətlərin
cari və ya keçmiş rəhbərləri və transmilli korporasiyaların
təsisçiləri daxildir.
2011-ci ilin 10-11 oktyabr tarixində “XXI Əsr: ümid və çağırışlar”
devizi altında 20-dən çox ölkədən qonaqların iştirakı ilə I Bakı
Beynəlxalq Humanitar Forumu keçirildi. 2012-ci ilin 4-5 oktyabr
tarixində II, 2013-cü ilin oktyabrın 31-də III, 2014-cü ilin 2-3
oktyabr tarixində IV, 2016-cı il sentyabrın 29-da V Bakı Beynəlxalq
forumları keçirildi. Bütün forumlara qatılan iştirakçıların sayı,
nüfuzu və dünyanın diqqətinin Bakıya yönəlməsi bu prosesin qlobal
əhəmiyyətindən xəbər verir.
Nəhayət, 25-26 oktyabr tarixində Bakı VI Beynəlxalq Humanitar
Forumu baş tutdu.
Prezident İlham Əliyevin Forumda çıxışı beynəlxalq miqyasda mühüm
tezislərlə zəngin idi:
“Əsrlər boyu müxtəlif dinlərin, xalqların nümayəndələri
Azərbaycanda bir ailə kimi sülh, əmin-amanlıq, mehribanlıq
şəraitində yaşamışlar və bu siyasət bu gün də davam etdirilir.
Azərbaycanda bu istiqamətdə dövlət siyasəti çox səmərəlidir və
gözəl nəticələrə gətirib çıxarır. Bizim tarixi keçmişimiz,
mədəniyyətimiz onu göstərir ki, müxtəlif dinlərin nümayəndələri
Azərbaycanda həmişə çox rahat yaşayıblar, bir ailə kimi yaşayıblar.
Bizim tarixi, dini abidələrimiz həm qədim tariximizi göstərir, eyni
zamanda, göstərir ki, Azərbaycan müxtəlif dinlərin nümayəndələri
üçün doğma diyar, doğma məkan olmuşdur... Azərbaycanda
multikulturalizm dövlət siyasətidir. Biz öz milli, dini
ənənələrimizə çox bağlıyıq, sadiqik və milli dəyərlər gələcək
inkişafımız üçün xüsusi rol oynayır. Deyə bilərəm ki, müasir
Azərbaycan dövləti çox dərin milli dəyərlər, milli-mənəvi dəyərlər
üzərində qurulubdur. Eyni zamanda, biz dünyaya açığıq. Qeyd etdiyim
kimi, Azərbaycan dünyada multikulturalizmin ünvanlarından birinə
çevrilibdir və bu şərəfli status artıq dünya birliyi tərəfindən
tanınır. Təsadüfi deyil ki, biz mənim Sərəncamımla 2016-cı ili
Azərbaycanda “Multikulturalizm İli” elan etdik. Hesab edirəm ki,
dünyada ilk dəfə olaraq belə bir təşəbbüs irəli sürülmüşdür. Bu,
bizim niyyətimizi göstərmişdir, 2016-cı ilə multikulturalizm adını
verməklə, ilk növbədə, biz dünyada Azərbaycanı olduğu kimi təqdim
etmək istədik. Göstərmək istədik ki, multikulturalizm Azərbaycanda
həm dövlət siyasətidir, həm həyat tərzidir, eyni zamanda, biz dünya
birliyinin diqqətini bu məsələyə cəlb etməyə çalışdıq. Çünki siz də
yaxşı bilirsiniz ki, bu gün həm siyasətçilər, ictimai xadimlər, həm
də media tərəfindən multikulturalizmlə bağlı çox ziddiyyətli
fikirlər səsləndirilir. Ona görə hesab edirəm ki, bu məsələ ilə
bağlı vahid yanaşma olmalıdır və burada heç bir ziddiyyətli fikrə
yer ola bilməz. Hesab edirəm ki, Azərbaycanın bu sahədəki təcrübəsi
həm təqdirəlayiqdir, həm də gözəl nümunə ola bilər. Biz
multikulturalizmin bəhrəsini gündəlik həyatda görürük. Bu gün
Azərbaycanda yaşanan sabitlik, vətəndaş həmrəyliyi, milli
həmrəylik, o cümlədən bu dəyərlərə əsaslanır... 2017-ci ili isə biz
“İslam Həmrəyliyi İli” elan etdik. Yenə də ona görə ki,
Azərbaycanda İslam həmrəyliyi tam bərqərar olub. Onu da
bildirməliyəm ki, Azərbaycan müsəlmanları vəhdət namazı qılırlar.
Hesab edirəm ki, Azərbaycan bu sahədə müsəlman aləmində çox önəmli
rol oynayır. Eyni zamanda, biz müsəlman aləminin diqqətini də bu
sahəyə cəlb etməyə çalışdıq. Çünki əfsuslar olsun ki, biz müsəlman
aləmində həmrəyliklə bağlı istədiyimizə nail ola bilməmişik.
Qarşıdurmalar, müharibələr, anlaşılmazlıq, toqquşmalar və digər
təhlükəli meyillər ölkələr üçün böyük problemə, faciəyə çevrilir,
milyonlarla insan həlak olur, evsiz-eşiksiz qalır, qaçqın, köçkün
vəziyyətinə düşür. Əlbəttə, biz çalışmalıyıq ki, bu sahədə də öz
təkliflərimizi verək, öz nümunəmizi göstərək ki, əgər İslam
həmrəyliyi və multikulturalizm anlayışları vəhdət təşkil edərsə və
dövlət siyasəti düzgün aparılarsa, bu, xalq tərəfindən də qəbul
edilərsə, onda ölkələrdə problem olmayacaq. Müasir Azərbaycan bunun
əyani, bariz sübutudur. Təsadüfi deyil ki, biz humanitar
əməkdaşlıqla, multikulturalizmlə bağlı bir çox tədbirlərə ev
sahibliyi edirik... Biz humanitar əməkdaşlığa çox böyük diqqət
göstəririk, bir çox təşəbbüslər irəli sürmüşük. Onlardan biri Bakı
Beynəlxalq Humanitar Forumudur”.
Aparılan siyasətində nəticəsində Bakı bu gün dünyanın
iqtisadi-siyasi-humanitar paytaxtına çevrilir. Son illərdə Bakı
“Cənubi Qafqazın və Mərkəzi Asiyanın gələcəyi ilə bağlı strateji
dialoq” mövzusunda Dünya İqtisadi Forumuna, Madrid Klubunun
toplantısına, Birinci Cənubi Qafqaz Forumuna, BMT-nin VII İnternet
İdarəçilik Forumuna, Asiya Siyasi Partiyaları Beynəlxalq
Konfransının VII Baş Assamleyasına, Dini Liderlərin Ümumdünya
Sammitinə, III Qlobal Açıq Cəmiyyətlər Forumuna, Asiya İnkişaf
Bankı Rəhbərlər Şurasının illik toplantısına və digər bu kimi mühüm
beynəlxalq toplantılara ev sahibliyi edib. Təsadüfi deyil ki,
qlobal qarşıdurmada olan ABŞ və Rusiya nümayəndələri də dialoq
aparmaq üçün məhz Bakını seçir.
Burada qeyd etdiyimiz kimi, Azərbaycanın dünyada artan nüfuzu,
ölkədə sabitliyin mövcudluğu və rəsmi Bakının dünya ölkələri üçün
etibarlı tərəfdaş olmasıdır. Bakının “Ekspo 2025” Ümumdünya
Sərgisinə ev sahibliyinə namizəd olması da Azərbaycanın ən böyük
uğurlarındandır. Bütün bunların fonunda Azərbaycanın bir dövlət
olaraq güclənməsi, regionun əsas gücü olaraq, dünyada əsas
aktorlardan birinə çevrilməsi və qlobal layihələrin iştirakçısı və
təşəbbüskarı olması faktı da ortadadır.
Asif
-
Hadisə21:10
Qırmızı işıqda keçən nazirin maşını aşdı - FOTO
-
Magazin120:22
Müğənni Yalının qohumu sevgilisi tərəfindən qətlə yetirildi - FOTO
-
Dünya19:57
Zelenski onu yeni vəzifəyə təyin etdi
-
Magazin119:15
Talıb Talenin toyu olacaq: özündən 15 yaş kiçik xanımla... - VİDEO
-
Nida Xəbər 18:55
Ermənistanla sərhəddə işlərin 35 faizi yerinə yetirildi
-
Magazin118:00
"Elgiz və Zaur verilişinə getmək üçün mənə pul verir"
-
Nida Xəbər 17:25
İlham Əliyev Almaniyada mühüm tədbirdə çıxış etdi - Yeniləndi
-
Rəsmi xronika16:53
İlham Əliyevin Almaniya XİN rəhbəri ilə görüşü keçirildi