Ermənistanın “humanitar yardım” şousu nəticə verə bilərmi? - FOTO

Gözlənldiyi kimi, Ermənistan Laçın sərhəd-keçid məntəqəsinin qarşısına yığdığı yük maşınlarını “nəticə” əldə edənə qədər orada saxlayacaq. Karvanın başında sərhədə gələn Ermənistan hökumətinin nümayəndəsi Vardan Sarkisyan deyib ki, sülhməramlılara yükün keçirilməsi üçün müraciət edilib, cavab alana qədər burada qalacaqlar. “Hadisə yerinə” Avropa İttifaqının müşahidə missiyasının nümayəndələrini də gətiriblər.

İrəvanın “humanitar yardım” şousu nəticə verə bilərmi?

Bu sualın cavabı ermənilər üçün ürəkaçan deyil. Çünki:

- Nəticə yalnız Azərbaycanın Laçın postunu bağlayaraq, heç bir alternativ imkan yaratmadığı halda olardı: rəsmi Bakı alternativ yol – Ağdam-Xankəndi marşrutunu təklif edir və məsələ həqiqətən dedikləri kimi ərzaq problemidirsə, bunun həll yolu var;
- Qarabağ Azərbaycan ərazisidir və bu, müharibəyə qədər beynəlxalq müstəvidə kağız üzərində əksini tapırdısa, müharibədən sonra bütün güc mərkəzləri reallığı qəbul ediblər, yaxud buna məcbur olublar;

Bu iki amil Ermənistanın “humanitar yardım” şousunun nəticə verəcəyi ehtimalını sıfırlayır. İrəvan ermənilərin “humanitar fəlakət”indən bəhs edəndə Ağdamdan istifadə etmək alternativi ilə üzləşir, ermənilərin bunu istəmədiyini deyəndə “Qarabağ Azərbaycan ərazisidir” cavabını alır.

Baş verənlərin təfsilatını Hikmət Hacıyev bir kəlmə ilə verib: Oyun bitdi!

Asif Nərimanlı