Bütün variantlar masanın üstündədir: Aİ Gürcüstana xəbərdarlıq etdi

Parlament seçkilərindən sonra Gürcüstan hakimiyyəti sabiq prezident Mixail Saakaşvilinin “Vahid Milli Hərəkat” partiyası və ona bağlı birliklərinin fəaliyyətini konstitusiyaya zidd kimi tanımaq təşəbbüsünü həyata keçirərsə, Avropa Komissiyasının reaksiyasına səbəb olacaq.

Publika.az xəbər verir ki, bu barədə “Politico”ya Aİ-nin xarici siyasət xidmətinin sözçüsü Piter Stano məlumat verib.

“Mövcud fəaliyyət kursu Gürcüstanın Aİ-yə yolunu təhlükə altında qoyur, üzvlük prosesini faktiki olaraq dayandırır. Avropa Komissiyası Gürcüstanın ritorikasını və hadisələrin gedişatını diqqətlə izləyir və buna uyğun cavab verməyə hazırdır. Bütün variantlar masanın üstündədir və o bəyanatlar reallaşarsa, biz buna uyğun hərəkət edəcəyik”, – Stano Gürcüstan hakimiyyətinin planlarını şərh edib.

Xatırladaq ki, avqustun 20-də hakim “Gürcü Arzusu-Demokratik Gürcüstan” partiyası bəyanat yayıb ki, qarşıdan gələn parlament seçkilərində qalib gəlsə və qanunverici orqanda konstitusiya çoxluğunu qazansa, keçmiş prezident Mixail Saakaşvilinin “Vahid Milli Hərəkat” partiyasını və ona bağlı olan birliklərin fəaliyyətini dayandıracaq.

Onu da əlavə edək ki, Gürcüstanda parlament seçkiləri oktyabrın 26-da keçiriləcək.

Tural