Rusiya təşvişdə: Ermənistana ABŞ-la bağlı xəbərdarlıq etdi - Yalnız kağız üzərindədir

Ermənistan, şübhəsiz ki, uyğun hesab etdiyi tərəfdaşlarla işləməkdə sərbəstdir, lakin Amerika texnologiyasını seçməsi suallar doğurur.

Publika.az xəbər verir ki, bunu Rusiya Xarici İşlər Nazirliyinin sözçüsü Mariya Zaxarova bildirib.

Daha əvvəl bildirilmişdi ki, Ermənistanın Baş naziri Nikol Paşinyan və ABŞ-ın vitse-prezidenti Ceyms Vens “Ermənistanla ABŞ arasında Nüvə Enerjisinin Sülh Məqsədləri ilə İstifadəsi Sahəsində Əməkdaşlıq Sazişi" üzrə danışıqları yekunlaşdıran birgə bəyanat imzalayıblar. Bu danışıqlar ABŞ istehsalı olan kiçik modul reaktorların (SMR) Ermənistanda 9 milyard dollar dəyərində yerləşdirilməsini nəzərdə tutur: ilkin olaraq 5 milyard dollar dəyərində avadanlıq, qalan 4 milyard dollar isə yanacaq təchizatı və reaktorların texniki xidməti üçün müqavilələr (uzunmüddətli perspektivdə).

Zaxarova bildirib ki, "Vaşinqtonun təklif etdiyi kiçik tutumlu nüvə elektrik stansiyaları nəinki ABŞ ərazisindədir, hətta prinsipcə mövcud deyil; onlar yalnız kağız üzərində mövcuddur".

O, həmçinin qeyd edib ki, İrəvanda elan edilən kiçik modul reaktorların tikintisi üzrə 9 milyard dollarlıq layihə ilə bağlı heç bir konkret təfərrüat verilməyib.

"Bu, mövzuya əlavə maraq yaradıb: bu cür reaktorların nə olduğu və artıq harada işlədiyi bəlli deyil", - deyə o əlavə edib.

Zaxarova qeyd edib ki, bir sıra Ermənistan KİV-ləri bu xəbəri Vaşinqtonun respublika iqtisadiyyatına misli görünməmiş bir investisiyası kimi təqdim etməyə tələsiblər. Lakin əsas sual layihənin maliyyə modelindədir.

Rusiya tərəfinin əldə etdiyi məlumata görə, bu, birbaşa ABŞ investisiyası deyil, Ermənistanın xərcləri öz üzərinə götürəcəyi sxemdir. Maliyyələşdirmənin əvvəllər elan edildiyi kimi, infrastruktur layihələrinin həyata keçirilməsi üçün yaradılan TRIPP fondu vasitəsilə təmin edilməsi gözlənilirdi. Lakin fondun özü hələ yaradılmayıb.

Zaxarova xatırladıb ki, Rusiya on illərdir Ermənistanın nüvə sənayesində etibarlı tərəfdaşıdır. Bu illər ərzində Rusiya onun istismarını və texniki xidmətini dəstəkləyib. "Hazırda stansiyanın ömrünün 2036-cı ilə qədər uzadılması üzərində birgə çalışırıq", - deyə o əlavə edib.

Rusiya Xarici İşlər Nazirliyinin sözçüsü vurğulayıb ki, Rusiya dünyada aşağı güclü nüvə elektrik stansiyalarından istifadə edən yeganə ölkədir və tərəfdaşlarına bütün enerji sahələrində sınaqdan keçirilmiş həllər təklif edib.

Tural