Həzm sistemini gücləndirən 7 QAYDA

Mədə ağrısı, qıcqırması və digər mədə problemləri ümumi sağlamlıq vəziyyətimizə mənfi təsir göstərir.

Publika.az xəbər verir ki, türkiyəli dietoloq Yeşim Temel Özcan mədənin vəziyyətini yaxşılaşdıran 7 məsləhət verib.

1. Hər yeməkdən əvvəl alma sirkəsi için

Mümkünsə, hər yeməkdən əvvəl 1 və ya 2 yemək qaşığı alma sirkəsi için. Fermentləşdirilmiş alma sirkəsi mədə yanğısını aradan qaldırır və azalmış mədə fermentini əvəz edir. Eyni zamanda, təbii dezinfeksiyaedici maddədir və qida maddələri ilə qəbul edilən bakteriyaları məhv edir.

2. Çuğundur mədə turşusunu tarazlayır

Qaynadılmış və ya turşuya qoyulmuş çuğundur mədə turşusu betain Hcl üçün ən yaxşı mənbədir. Çuğundur öd turşularını da stimullaşdırdığı üçün qəbizliyə çox yaxşı təsir edir. Alma sirkəsi ilə qaynadılmış çuğundur çox faydalıdır.

3. Yeməkdən əvvəl və yemək zamanı su içməyin

Yeməkdən 15 dəqiqə əvvəl su içməyin. Əgər yediklərinizin yaxşı həzm olunmasını istəyirsinizsə, yeməkdən 40-50 dəqiqə əvvəl su için. Yeməkdən də 1 saat sonra su içməyə icazə verilir. Az mədə turşusu həzmi çətinləşdirir, onun su və ya digər mayelərlə azaldılması isə həzmi daha da çətinləşdirir.

4. Tikələri 8-9 dəfə çeynəyin

Tikələr hərtərəfli çeynənilməlidir, 8-9 dəfə. Çeynənilmiş qidaları həzm etmək asandır və beyin toxluq siqnalını daha tez göndərir.

5. Axşamlar çiy salat yeməyin

Axşamlar salata üstünlük verməyin. Xam tərəvəz və meyvələri həzm etmək çətindir. Odur ki, buxarda hazırlanmış, zeytun yağında bişən tərəvəzlərə və ya bankaya qoyulmuş tərəvəzlərə üstünlük verin.

6. Kələm suyu için

Evdə hazırlanmış turşular bağırsaq florasını və immun sistemini gücləndirən vacib probiotik qidalardır. Yeməkdən əvvəl 1 və ya iki xörək qaşığı evdə hazırlanmış kələm turşunun suyunu içmək olar.

7. Xəmir xörəkləri və mayalı məhsulları azaldın

Rasionda xəmir və mayalı məhsulları azaldıb protein tərkibli qidalara daha çox üstünlük verin.

Aytən Məftun