Məşhur həkim uzunmüddətli karantinin təhlükəsindən DANIŞDI

Tanınmış pediatr və teleaparıcı Yevgeni Komarovski uzunmüddətli karantin günlərinin insanlara mənfi təsirlərindən danışıb.

Publika.az Rusiya mətbuatına istinadən xəbər verir ki, o, yutub kanalında yayımladığı videoda izolyasiyanın əsas təhlükələrini izah edib.

Onun sözlərinə görə, karantin zamanı insanların aktiv həyatlarından kənarlaşması çox təhlükəlidir.

O, izləyiciləri əllərində olan hər hansı bir fəaliyyətlə məşğul olmağa, xüsusən də tez-tez cinsi əlaqədə olmağa çağırıb.

“Evi təmizləyin - mümkün qədər hərəkət edin. Hər gün rəqs edin, mahnı oxuyun, sekslə məşğul olun” , - deyə həkim məsləhət verib.

Həkim az yeməyi və çox miqdarda spirt içməməyi tövsiyə edib. Bundan əlavə, Komarovski karantini uşaqlarla vaxt keçirmək və yaşlı qohumlarla söhbət etmək üçün yaxşı fürsət adlandırıb.

Komarovski izləyiciləri yemək yeyərkən televizoru yandırmamağa və nahar vaxtından ailə ilə ünsiyyət qurmaq üçün istifadə etməyə çağırıb.

Xatırladaq ki, daha əvvəl Komarovski gələcəkdə koronavirus səbəbiylə bəşəriyyətin hansı qlobal problemlərlə üzləşə biləcəyini proqnozlaşdırmışdı. O qeyd etmişdi ki, pandemiyanı peyvənd ilə aradan qaldırmaq qeyri-mümkün ola bilər, kütləvi dezinfeksiya isə allergik xəstəliklərin artmasına səbəb ola bilər.

Aytən Məftun