Sağlamlıq

Bu meyvə ruh halını dərhal yaxşılaşdırır

13 Fevral 2024 14:01

C vitamini ilə zəngin olan kivinin yeni bir faydası üzə çıxıb.

Publika.az xəbər verir ki, tədqiqatçıların sözlərinə görə, meyvə orqanizmə C vitamini əlavələrindən daha sürətli və daha uzun müddət təsir edir.

Yeni Zelandiyanın Otaqo Universitetinin tədqiqatçıları səkkiz həftə ərzində C vitamini səviyyəsi aşağı olan 155 yetkinin rasionunu izləyiblər. İştirakçıların bir qismi hər gün C vitamini qəbul ediblər, digər hissəsi isə iki kivi yeyib. Sonra iştirakçılar smartfon anketləri vasitəsilə gümrahlıq, əhval-ruhiyyə, yuxu keyfiyyəti və fiziki aktivlikləri barədə məlumat veriblər.

"British Journal of Nutrition"da dərc edilən nəticələr göstərib ki, kivi dörd gün ərzində bədəni və ümumi əhval-ruhiyyəni yaxşılaşdıra bilir. Bu təsir 14-16-cı günlərdə zirvəyə çatıb.

Araşdırmanın aparıcı müəllifi Dr. Ben Fletçer qeyd edib ki, bu araşdırma yediklərimizin hisslərimizə dərhal təsir edə biləcəyini görməyə kömək edib.