Siqareti tərgitdikdən sonra ağciyərlərdə dəyişiklik nə vaxt başlayır?

Siqaretdən imtina etdikdən sonra ağciyərlərdə ilk müsbət dəyişikliklər 2 həftə – 3 ay ərzində müşahidə olunmağa başlayır.

Publika.az xəbər verir ki, bu barədə TASS-a pulmonoloq Marina Makarova danışıb.

Həkimin sözlərinə görə, ağciyərlər bərpa olunma qabiliyyətinə malikdir və bu orqanlarda regenerasiya prosesi mümkündür. Lakin bəzi zədələnmələr tamamilə geri dönməz ola bilər.

“Bərpa dərəcəsi insanın yaşı, siqaret çəkmə stajı və mövcud xəstəliklərdən asılıdır”, - deyə həkim qeyd edib.

Makarova bildirib ki, siqaretdən imtina edildikdə mukosiliar sistemin işi bərpa olunur: epitel toxumasının kirpikli hüceyrələri yenidən formalaşır və tənəffüs yolları mikroblardan təmizlənir, oksidləşmə prosesi azalır. Eyni zamanda qan dövranı və ağciyər funksiyası yaxşılaşır. Nəticədə insan daha az öskürür, təngnəfəslik azalır.

Bununla yanaşı, xroniki obstruktiv ağciyər xəstəliyi zamanı bəzi dəyişikliklərin geri dönüşsüz olduğu da vurğulanıb. Lakin siqaretdən imtina xəstəliyin gedişinə müsbət təsir göstərir, tənəffüs funksiyasının sürətlə pisləşməsini ləngidir və hospitalizasiya riskini azaldır.

Bundan əvvəl isə pulmonoloq Olqa Çagaraeva bildirib ki, siqaret tüstüsü dərindən çəkilməsə belə, nikotin və zəhərli maddələr ağız boşluğunun selikli qişası vasitəsilə orqanizmə sorulur və asılılıq yaranır. Həkim əlavə edib ki, tüstü ağız, udlaq və qırtlaq selikli qişası ilə təmasda olduqda kanserogen maddələr bədxassəli dəyişikliklərin yaranmasına səbəb ola bilər.

Adəm