Şəmkirdə əkin sahələri od tutub yanır – FOTOLAR

Şəmkirin Qaracəmirli kəndinin fermerləri əkin sahələrinin susuzluqdan əziyyət çəkdiyini, aidiyyəti qurumların yonca sahələrini suvarmaq üçün fermerləri su ilə təmin etməkdə aciz qaldığını iddia edirlər.

Bir qrup kənd sakininin Publika.az-a bildirdiyinə görə, yayın isti günlərində əkin sahələrini suvara bilmirlər. Onlar problemin uzun müddətdir ki, davam etdiyini deyirlər. Sakinlərin iddialarına görə, yonca əkilən torpaqların susuzluqdan "dodaqları çatlayıb".

Qaracəmirli sakinlərinin sözlərinə görə, təsərrüfat sahələrini suvarmaq üçün dəfələrlə yerli icra orqanlarına məlumat veriblər. Lakin bu günə qədər onları eşidən olmayıb.

Kiçik və orta ölçülü heyvandarlıq təsərrüfatlarının ot və yem ehtiyatlarını qarşılamaqla məşğul olan fermerlər bu gedişlə qışda onları çətin sınaqların gözlədiyini söyləyirlər. Qaracəmirli kənd sakinləri onlarla fermerin yay dövründə bu cür problemlə üzləşdiyini vurğulayırlar.

Redaksiyamızdan onların eşidilməyən səslərinin yuxarı instansiyalara çatdırılmasını xahiş edirlər.

Məsələni araşdırmaq üçün Kənd Təsərrüfatı Nazirliyi ilə əlaqə saxladıq. Nazirlikdən bildirdilər ki, su və meliorasiya məsələlərinə Meliorasiya və Su Təsərrüfatı Açıq Səhmdar Cəmiyyəti baxır. Adıçəkilən qurumla əlaqə saxlamağa çalışsaq da, sualımızı ünvanlayacaq şəxs tapmadıq.

Ümid edirik ki, ən qısa zamanda Şəmkirin Qaracəmirli kəndinin fermerlərinin problemi aradan qaldırılacaq.

Tural Turan