Makronun tədbirlərinin təşkilatçısı olan azərbaycanlı xanım: İlk dəfədir ki...

Həmyerlimiz Ülkər Müller Fransanın nüfuzlu layihələrində çalışaraq ölkənin birinci xanımı Bricit Makronun da iştirak etdiyi tədbirlərin təşkilatçısı kimi fəaliyyət göstərməyə başlayıb. Uzun müddətdir ki, Fransada yaşayıb çalışan Ülkər xanım bugünədək Azərbaycanın, tariximizin Fransada qərəzsiz tanıdılması üçün bir sıra işlər görüb.

Publika.az Ülkər Müllerlə müsahibəni təqdim edir.

- Ülkər xanım, fəaliyyətiniz barədə bizə ətraflı bəhs etməyinizi istərdim…

- İki il yarımdır ki, Fransanın dekorativ-tətbiqi sənət federasiyası olan "Ateliers d'Art de France"da çalışıram. Federasiyanın təşkil etdiyi iki beynəlxalq sərginin ictimaiyyətlə əlaqələr üzrə meneceriyəm. Biennal Beynəlxalq İrs Sərgisinin təşkilatçılarındanam. Artıq sərgimizi gerçələşdirmişik. Bu tədbir hər il maddi və qeyri-maddi mədəni irsin qorunması, restavrasiyası və tanıdılması üzrə ixtisaslaşmış şirkətləri, sənətkarları və QHT-ləri bir araya gətirir.

Onu da nəzərinizə çatdırım ki, sərgi Fransa prezident administrasiyası, Mədəniyyət Nazirliyi və UNESCO-nun dəstəyi və nəzarəti ilə keçirilir. Hər il 300-dən çox sərgi iştirakçısı, 20 mindən çox ziyarətçi qəbul edir. Sərginin ictimaiyyətlə əlaqələr işi tamamilə mənə həvalə olunmuşdu. İstər mətbuatla, istərsə də digər şirkətlərlə əməkdaşlıqla, video və foto işıqlandırma məsələlərilə bağlı bütün işlər mənim nəzarətimdə idi.

Bu tədbirlərdən əlavə, həm də federasiyanın dekorativ-tətbiqi sənətə həsr olunmuş qalereya və konsept şəbəkəsinin reklam işi ilə də məşğulam. Sərgilər bitəndən sonra Biennal tədbirinin hazırlıqlarına başlayacam.

- Bricit Makronla ünsiyyət qurmaq imkanınız oldu?

- Bilirsiniz, bu, komanda işidir. Bricit Makronun, nazir Alen Qrisetin kommunikasiya üzrə işçiləri ilə çalışdım. Gəlişin düzgün təşkil edilməsi, qüsursuz işıqlandırılması, onların sərgi boyu məlumatlandırılması və s.

İlk dəfədir ki, belə məsuliyyətli işi mənə həvalə edirdilər. Çox sevinirəm. Əsas işim isə mənə tapşırılan layihə və tədbirlərin yaxşı tanıdılmasıdır ki, belə vacib şəxslər tədbirdə iştirak etsinlər. Gələcəkdə daha böyük layihələrdə çalışmağı arzulayıram.

Leyla Sarabi