Ağalı sakini: “Beş-on günə köçəcəyik” – ÖZƏL

“İnşallah, beş-on günə köçməliyik. Bu barədə bizə tapşırıq da verilib. Ağalı kəndinin təməlinin qoyulması prosesində mən də cənab prezidentlə birgə işləmişəm. Hazırda elə Ağalı kəndində yenidənqurma işlərində çalışıram. 8 ailə üzvümüz var, 2 mərtəbəli 5 otaqlı ev veriblər. 35-ci mənzil bizə təqdim olunub”.

Bunu Publika.az-a açıqlamasında bu yaxınlarda ilk köçün baş tutacağı Zəngilan Rayonunun Ağalı kənd sakini, keçmiş məcburi köçkün Vəliyəddin Paşayev deyib.

Vəliyəddin Paşayev bildirib ki, 1 il 2 aydır ki, Ağalı kəndindəki yenidənqurma işlərində çalışır və evlərin tikintisində də yaxından iştirak edib: “Müasir quruluşda inşa edilən evlərdir. Elə özümüz tikmişik. Qardaşım da tikinti prosesində yaxından iştirak edib. Ailə üzvlərimizin də işlə təmin olunacağını düşünürük. Əgər buradan oraya köçürürlərsə, deməli, işlə də təmin etməlidirlər. İyunun sonuna qədər birinci köç baş tutacaq. Hazırda Ağalıda 200 ev tikilir. Onlardan 41-i hazırdır. Ağalı 3 kənddir və həmin 3 kənd indi bir kənddə birləşdirilib”.