Bu səfirliklərimizin təhlükəsizliyi gücləndirilməlidir - Musabəyov

“Azərbaycanın Britaniyadakı səfirliyinə zorla daxil olaraq oradan bayrağı çıxarmaq, onu təhqir etmək, yerə atmaq fövqəladə bir hadisədir. Düşünürəm ki, bu zorakılığı həyata keçirənlər ciddi cəzalara məruz qalmalıdırlar. Bu ona görə edilməlidir ki, digərləri bu kimi addımlardan çəkinsinlər. Başqalarının ağlına bu cür qələtlər ümumiyyətlə gəlməsin”.

Bunu Publika.az-a açıqlamasında Milli Məclisin deputatı Rasim Musabəyov deyib.

Deputat bildirib ki, elə səfirliklərimiz var ki, onların mühafizəsini Azərbaycandan göndərilən xüsusi mühafizəçilər təşkil edirlər:

“Bu cür hərəkətlərin gerçəkləşmə ehtimalı böyük olan digər səfirliklərimizin də mühafizəsi gücləndirilməlidir. Bu, olduqca vacibdir. Digər səfirliklərimizin mühafizəsini həm Azərbaycandan göndərilən mühafizə işçiləri, həm də yerli polisin köməyindən istifadə olunmaqla gücləndirilə bilər. Hər zaman bu cür təhlükələr, risklər olmur. Amma vəziyyətə görə, bu cür gücləndirmə tədbirlərinin gerçəkləşdirilməsi vacibdir. Fikrimcə, istisna təhlükə halları yarandıqda səfirliklərimizin mühafizəsi gücləndirilməlidir”.

Rasim Musabəyovun sözlərinə görə, Vyana Konvensiyasına zidd olaraq Azərbaycanın Londondakı elçiliyinin binası hücuma məruz qalması təəssüfedici bir durumdur:

“Bundan başqa, digər səfirliklərə də bu cür yaramaz hərəkətlər həyata keçirilir. Yada salaq ki, ABŞ-ın Tehrandakı səfirliyinə də hücum təşkil edilmişdi. Həmin vaxt səfirliyin işçiləri də uzun müddət girov saxlanmışdı. Hətta səfirliyin arxivi dağıdılmışdı. Təəsssüf ki, ara-sıra bu cür hadisələr baş verir. Bir çox hallarda Azərbaycanın səfirliklərinin qarşısında ermənilər etiraz aksiyaları keçirirlər. Eyni zamanda, hansısa müxalif qruplar etiraz edirlər. Təkcə Azərbaycanın yox, Birləşmiş Ştatların, Fransanın, Britaniyanın və digər ölkələrin də səfirlikləri bu cür hücumlara məruz qalır”.

Tural Turan