Tramp HƏMAS-a 48 saat VAXT VERDİ - “Digər ölkələr hərəkətə keçəcək”

"HƏMAS tez bir zamanda öldürülmüş girovların cəsədlərini İsrailə təhvil verməyə başlamalıdır".

Publika.az xəbər verir ki, bu ultimatumu şənbə günü ABŞ Prezidenti Donald Tramp verib.

O, bunun 48 saat ərzində baş vermədiyi təqdirdə təşkilatın ağır nəticələrlə üzləşə biləcəyi barədə xəbərdarlıq edib.

“Biz Yaxın Şərqdə çox güclü bir sülh yaratmışıq və bunun daimi olacağına inanıram,” – Tramp özünün "Truth Social" platformasında yazıb.

“HƏMAS iki amerikalı da daxil olmaqla öldürülmüş girovların cəsədlərini tez bir zamanda qaytarmalıdır. Əks halda, bu böyük sülh prosesinə daxil olan digər ölkələr hərəkətə keçəcək. Bəzi cəsədlərə çatmaq çətindir, amma digərlərini indi qaytara bilərlər və nədənsə bunu etmirlər.

Bəlkə bu, onların tərkisilah edilməsi ilə bağlıdır, amma mən ‘hər iki tərəf ədalətli şəkildə rəftar ediləcək’ dediyimdə, bu yalnız onların öhdəliklərinə əməl etdikləri halda keçərlidir. Gələn 48 saatda nə edəcəklərinə baxacağıq. Mən vəziyyəti çox yaxından izləyirəm”, - deyə ABŞ lideri əlavə edib.

Tramp həmçinin bildirib ki, Qətər gələcəkdə Qəzzada mümkün sülhməramlı missiyaya töhfə verməyə hazır olduğunu ifadə edib. Bu açıqlama, ABŞ prezidentinin Asiya turu çərçivəsində Dohada Qətər Əmiri Şeyx Təmim bin Həməd Al Tani ilə görüşündən sonra verilib.

Tramp Qətəri “ABŞ-ın böyük müttəfiqi” adlandıraraq qeyd edib ki, bu ölkənin mümkün iştirakı müharibədən sonrakı Qəzzada sabitliyin bərpasına və bölgədə davamlı sülhün qorunmasına yardım edə bilər.

İsrail rəsmilərinin məlumatına görə, HƏMAS indiyədək 15 girovun qalıqlarını təhvil verib, 13 nəfərin cəsədləri isə hələ də Qəzzada saxlanılır. Hərəkat bəyan edib ki, bütün qalıqlara çıxış imkanı yoxdur və bəzilərinin yerləri məlum deyil. Lakin İsrail tərəfi bu açıqlamanı yalan adlandırıb.

Hüseyn İbadlı