Şahbaz Xuduoğlu “Nobel” alan yazıçıdan danışdı: “Sadəcə təəssüflənirəm”

2022-ci il Ədəbiyyat üzrə Nobel mükafatının qalibi açıqlanıb.

Publika.az xəbər verir ki, bu barədə Nobel Komitəsindən məlumat verilib.

Məlumata görə, builki mükafata fransız yazıçısı Anni Erno layiq görülüb.

Bəs Azərbaycanda bu müəllif tanınırmı? Əsərləri ölkəmizdə çap olunubmu? Ernonun “Nobel” alacağı gözlənilən idimi?

Suallarımızı naşir Şahbaz Xuduoğluna ünvanladıq. Şahbaz Xuduoğlu Publika.az-a açıqlamasında müəllifi tanımadığını bildirdi:

“Doğrusu, bu gün ədəbiyyat üzrə Nobel Mükafatına layiq görülən müəllifi tanımıram. Təəssüf edirəm ki, onun əsərləri Azərbaycan dilinə tərcümə olunmayıb. Mən buna sadəcə təəssüflənirəm. Sonradan onun həyat və yaradıcılığı ilə tanış oldum. Gördüm ki, xeyli sayda mükafat alıb. Yəni, Anni Erno bizim gözümüzdən qaçıb. Əlbəttə, yaxşı olardı ki, onun əsərləri Azərbaycan dilində çap olunsun. Əslində mən Nobel Mükafatının bu cür gözlənilməzliyinə çox dəyər verirəm. Heç kəsin gözləmədiyi bir yazıçı oldu. Bu mənada xeyli təəccüb içərisindəyəm. Amma Anni Ernonun bioqrafiyasına baxanda görürsən ki, bütün həyatını ədəbiyyata, romamçılığa həsr etmiş bir yazıçıdır”.

Tural Turan