İsveçdə “Nobel həftəsi” başlayır

Oktyabrın 3-dən İsveçin paytaxtında növbəti “Nobel həftəsi” başlayır.

Publika.az “nobelprize.org” saytına istinadla xəbər verir ki, oktyabrın 3-də fiziologiya və tibb üzrə qalibin adı elan ediləcək.

Oktyabrın 4-də fizika, 5-də kimya üzrə Nobel mükafatı laureatlarının adları açıqlanacaq.

Ədəbiyyat üzrə Nobel mükafatının sahibi oktyabrın 6-da bəlli olacaq. Oktyabrın 7-də sülh və nəhayət, oktyabrın 10-da iqtisadiyyat üzrə Nobel mükafatı qaliblərinin adları elan olunacaq.

Alfred Nobel (1833-1896) öz vəsiyyətində fiziologiya və tibb üzrə laureatın seçilməsini 1810-cu ildə əsası qoyulmuş və hazırda dünyanın aparıcı təhsil və elmi tibb mərkəzlərindən biri olan Stokholmdakı Karolinsk İnstitutuna həvalə edib. Onun nəzdində yaradılmış Nobel Komitəsi beş daimi üzvdən ibarətdir ki, onlar da öz növbəsində məsləhətləşmələrə ekspertlər dəvət etmək hüququna malikdirlər. Namizədlər üçün son tarix yanvarın 31-də başa çatıb, bundan sonra nəzərdən keçirmə prosesi başlayıb.

Nobel komitələri son ana qədər mükafata iddialıların özləri və ya onları irəli sürənlər haqqında heç bir məlumat vermirlər. Mütəxəssislər də öz növbəsində gizli saxlanılan adlarla bağlı fərziyələr irəli sürürlər.

Hüseyn İbadlı