ABŞ-dan Şimali Koreyaya xəbərdarlıq: Əsgərlərin Ukrayna sərhədini keçsə...

ABŞ Dövlət Departamenti Kursk bölgəsində Şimali Koreya hərbçiləri arasında itkilərin olduğunu bildirib. Şimali Koreya əsgərlərinin hərbi əməliyyatlarda iştirak etmək üçün Ukrayna ərazisinə daxil olmasını potensial eskalasiyanın artması kimi qiymətləndiriləcəyi barədə xəbərdarlıq edib.

Publika.az “European Truth”a istinadən xəbər verir ki, bunu Dövlət Departamentinin sözçüsü Metyu Miller brifinq zamanı deyib.

Millerdən Şimali Koreya qoşunlarının sərhədi keçəcəyi təqdirdə Ukrayna üçün qanuni hədəf olub-olmayacağı soruşulub. O bildirib ki, ABŞ-ın fikrincə, Kursk bölgəsində yerləşdirilən Şimali Koreya ordusu artıq qanuni hədəflərdir.

“Onlar müharibəyə girdikləri üçün döyüşçüdürlər və Ukrayna hərbçilərinin qanuni hədəfləridir”, - deyə o vurğulayıb.

Miller qeyd edib ki, Şimali Koreya əsgərlərinin Rusiyada döyüş meydanında həlak olduğunu görüb.

Miller əlavə edib ki, bu hadisələr kontekstində Birləşmiş Ştatlar son həftələrdə Ukraynanın müdafiə qabiliyyətinin gücləndirilməsinə yönəlmiş addımlar atır və biz bunu davam etdirəcəyik.

Ukrayna Müdafiə Nazirliyinin Baş Kəşfiyyat İdarəsinin məlumatına görə, Şimali Koreya bölmələri azı 30 əsgərini itirib.

Pentaqonun sözçüsü, general-mayor Pat Rayder isə bildirib ki, Amerika tərəfinin məlumatına görə, Şimali Koreya qoşunları ilk olaraq Kursk bölgəsində Rusiya qüvvələri ilə döyüşə girib və itkilər verib.

Adəm Abbaslı