“Meta”nı 1,4 trilyon dollarlıq cərimə gözləyir - Şirkətə qarşı böyük məhkəmə işi

“Meta” korporasiyası uşaqları və yeniyetmələri “Facebook” və “Instagram” platformalarında daha çox vaxt keçirməyə sövq etməkdə ittiham olunur. Şirkət bu iddialara görə 1,4 trilyon dollara qədər cərimə ilə üzləşə bilər.

Publika.az xəbər verir ki, bu barədə xarici KİV yazıb.

Məlumata görə, Kaliforniya, Kolorado, Kentukki və Nyu-Cersi ştatlarının rəhbərlikləri “Meta”nı “Facebook” və “Instagram”da uşaqların və yeniyetmələrin platformalarda mümkün qədər uzun müddət qalmasına hesablanmış funksiyalardan istifadə etməkdə ittiham edib.

2023-cü ildə ümumilikdə 29 ABŞ ştatı “Meta”ya qarşı məhkəmə iddiası qaldırıb. Hazırda isə ilk olaraq dörd ştatın iddialarına baxılır.

“Meta”nın öz hesablamalarına görə, bu işlər üzrə nəzəri olaraq tətbiq edilə biləcək maksimum sanksiyaların məbləği 1,4 trilyon dollara çata bilər. Bu rəqəm şirkətin bazar dəyərinin demək olar ki, tamamına bərabərdir. Bununla belə, hüquqşünaslar belə böyük məbləğdə cərimənin tətbiq olunmasını olduqca az ehtimal edirlər.

İddiaçılar həmçinin “Meta”nın azyaşlılar üçün yarana biləcək risklərdən xəbərdar olduğunu və 13 yaşdan kiçik uşaqların məlumatlarını valideynlərin razılığı olmadan topladığını bildirirlər.

Şirkət isə ittihamları rədd edir və azyaşlı istifadəçilərin müdafiəsi üçün mövcud təhlükəsizlik tədbirlərinə istinad edir.

Məhkəmə prosesində “Meta”nın rəhbəri Mark Zukerberq, “Instagram”ın rəhbəri Adam Mosseri və şirkətin keçmiş əməkdaşlarının ifadə verməsi gözlənilir.