Obamanın sərxoş mühafizəçiləri Ağ Evin hasarını dağıtdılar

ABŞ-ın Məxfi xidmətinin iki əməkdaşı xidməti maşınla Ağ Evin təhlükəsizliyinin təmin olunması üçün qurulan hasarı dağıdıblar.

Publika.az “The Washington Post” nəşrinə istinadən xəbər verir ki, hadisənin iştirakçılarından biri prezident Barak Obamanın şəxsi mühafizəsinin rəis müavinidir.

O və onun sükan arxasında olan həmkarı sərxoş olublar. Onların əyləncə gecəsindən qayıtdığı təxmin edilir. Hadisə martın 4-də baş verib. Məxfi xidmətin əməkdaşları həmin gecə saxlanılıb, lakin sonradan buraxılıb. Hadisə barəsində Məxfi xidmətin rəhbəri Cozef Klensi, ABŞ milli təhlükəsizlik naziri Ceyu Conson və prezident Obamaya məlumat verilib.

Məxfi xidmətin rəsmi nümayəndəsi Brayan Liri bildirib ki, əməkdaşların hərəkəti ilə bağlı təhqiqat aparılır. Liri vurğulayıb ki, günahkarlara cəza veriləcək.

Qeyd edək ki, ABŞ-ın Məxfi xidməti dövlətin birinci şəxslərinin, həmçinin prezidentin mühafizəsi ilə məşğul olur. Bir ay əvvəl baş verən qalmaqallar seriyasından sonra xidmətin rəhbərliyi dəyişdirilib.

Ömər Dağlı