Ekologiya

Xəzərin suyunun çirklənmə səviyyəsi azalıb - Muxtar Babayev

21 May 2020 17:25

2020-ci ilin mart, aprel, may aylarında havanın çirkliliyi əvvəlki illərin cari dövrü ilə nisbətdə diqqətçəkən dərəcədə azalıb.

Publika.az xəbər verir ki, bu sözləri Nazirlər Kabineti yanında Operativ Qərargahın bugünkü mətbuat konfransında Ekologiya və Təbii Sərvətlər naziri Muxtar Babayev deyib.

O bildirib ki, pandemiya dövründə havanın çirkliliyinin azalması avtomobillərdən minimum istifadə və sənaye müəssisələrinin fəaliyyətinə fasilə verməsi ilə bağlıdır: "Nardaran, Pirşağı, Bilgəh ərazilərində dənizdə aparılan son monitorinqlər sahilboyu ictimai-iaşə obyektlərinin fəaliyyət göstərmədiyindən dəniz suyunun çirklənmə səviyyəsində azalmanın müşahidə edildiyini deməyə əsas verir".

Nazir əlavə edib ki, tullantıların zərərsizləşdirildiyi poliqonda proses ciddi qaydalar çərçivəsində həyata keçirilir: "Yandırılan zibillərin kül və tüstüsü ətraf mühit üçün zərərli deyil".