Məşhur futbolçu SAXLANILDI

Braziliya futbolunun dünyaya qazandırdığı ən böyük istedadlardan olan Ronaldinyo saxlanılıb.

Publika.az xəbər verir ki, ulduz futbolçu Paraqvay polisi tərəfindən nəzarətə alınıb.

“ESPN Braziliya”da yer alan xəbərə görə, o, saxta sənəd və pasportdan istifadə etməkdə ittiham olunur. Ronaldinyo ilə yanaşı, qardaşı Assis də nəzarətə götürülüb. Onların Asunsion şəhəri yaxınlığında yerləşdikləri hoteldə qalmalarına icazə verilib. Lakin yanlarındakı şəxs həbs edilib.

Məsələ ilə bağlı açıqlama verən Paraqvay Xarici İşlər naziri Euklides Asevedo Ronaldinyo və qardaşının istintaqa cəlb olunduğunu və ifadə vermək məcburiyyətində qaldığını bildirib. Həbs olunub-olunmayacaqlarına isə daha sonra qərar veriləcək.

Nə olmuşdu?

Qardaşı ilə birlikdə Braziliyada Quaiba gölü yaxınlığında icazəsiz tikili inşa edən Ronaldinyo 2018-ci ildə məsuliyyətə cəlb olunmuş və dövlət tərəfindən 8,5 milyon dollar miqdarında cərimə edilmişdi. Bu cəriməni ödəyə bilməyən ulduzun ölkədən kənara çıxması qadağan olunmuşdu. Bundan sonra futbolçu Braziliyanın turizm səfiri kimi qələmə verildi və xaricə səyahətlərini davam etdirdi. Son günlərdə maliyyə baxımından ciddi sıxıntılar yaşayan 39 yaşlı Ronaldinyonun təkcə Braziliyada 57 mülkü əlindən alınıb.

Zümrüd