Əfsanə öldü: “Real” onu niyə ala bilməmişdi?

Dekabrın 2-də əfsanəvi polşalı futbolçu Lyutsian Brıxçi 91 yaşında Varşavada vəfat edib.

Publika.az xəbər verir ki, Brıxçi futbolda ilk addımlarını “Poqon” komandasında atıb. 1954-cü ildə orduya çağırılıb və Varşavanın “Legiya” klubunun oyunçusu olub.

Məhz ordu komandası ilə Brıxçi dörd Polşa çempionluğu titulunu (1955, 1956, 1969 və 1970) və dörd Polşa Kubokunu (1955, 1956, 1964 və 1966) qazanıb. “Legiya”da 19 mövsümdə 368 oyun keçirib və 182 qol vurub.

Onun klub tarixindəki qol rekordu hələ də yenilməyib.

1969/70 mövsümündə “Legiya” ilə birlikdə Brıxçi Çempionlar Kubokunun yarımfinalına yüksəlib. Bu mövsümdən sonra “Real Madrid”in nümayəndələri kluba gələrək ona müqavilə təklif ediblər. Polyak ispanların şərtləri ilə razılaşıb, lakin kommunist rejiminin qadağaları səbəbindən ölkəni tərk edə bilməyib.

Sonradan o, İtaliyanın “Milan” klubuna keçmək imkanı qazanıb, lakin siyasi vəziyyət yenidən bu transferə mane olub.

Oyunçu karyerasını bitirdikdən sonra uzun illər “Legiya”da məşqçi kimi çalışıb.